អាមេរិក ៖ ក្រុមមន្ត្រីសហរដ្ឋអាមេរិក កំពុងរៀបចំសំណើដែលនឹងបន្ធូរបន្ថយទណ្ឌកម្មលើវិស័យប្រេងរបស់វ៉េណេហ្ស៊ុយអេឡា ដោយអនុញ្ញាតឲ្យក្រុមហ៊ុន និងប្រទេសជាច្រើនទៀតនាំចូលប្រេងឆៅរបស់ខ្លួន ប្រសិនបើប្រទេសអាមេរិកខាងត្បូងនេះធ្វើដំណើរឆ្ពោះទៅរកការបោះឆ្នោតប្រធានាធិបតីដោយសេរី និងយុត្តិធម៌ នេះបើយោងតាមមនុស្សចំនួន៥នាក់ដែលបានដឹងអំពីផែនការទាំងនេះ។

ទីក្រុងវ៉ាស៊ីនតោន បាននិងកំពុងព្យាយាមលើកទឹកចិត្តដល់ការចរចារវាងប្រធានាធិបតី លោកនីកូឡាស ម៉ាឌូរ៉ូ ( Nicolas Maduro) និងក្រុមប្រឆាំងនយោបាយជុំវិញការបោះឆ្នោតនៅប្រទេសវ៉េណេហ្ស៊ុយអេឡា និងការទាមទារផ្សេងទៀត។ ការដាក់ទណ្ឌកម្ម ត្រូវធ្វើឡើង បន្ទាប់ពីការបោះឆ្នោតឡើងវិញឆ្នាំ ២០១៨ របស់លោកម៉ាឌូរ៉ូ ដែលប្រទេសលោកខាងលិចជាច្រើនបានចាត់ទុកថា មានការក្លែងបន្លំ។

ការបន្ធូរបន្ថយទណ្ឌកម្ម គឺជាវិធីសាស្ត្រនៃការបញ្ចុះបញ្ចូលដែលបានធ្វើឡើងកាលពីអតីតកាល ដោយសហរដ្ឋអាមេរិក ប៉ុន្តែរហូតមកដល់ពេលនេះ បានធ្វើឲ្យមានការអនុញ្ញាតតិចតួចបំផុត រួមទាំងក្រុមហ៊ុន Chevron Corp ដែលបានអនុញ្ញាតឲ្យក្រុមហ៊ុនពង្រីកប្រតិបត្តិការនៅក្នុងប្រទេសវ៉េណេហ្ស៊ុយអេឡា និងនាំចេញប្រេងរបស់ខ្លួនទៅកាន់សហរដ្ឋអាមេរិក ចាប់តាំងពីខែវិច្ឆិកាមក។

សេតវិមាន បាននិយាយកាលពីថ្ងៃពុធថា ទីក្រុងវ៉ាស៊ីនតោន នៅតែបន្តទទូចថា ការបន្ធូរបន្ថយបន្ថែមទៀត នឹងអាស្រ័យលើវឌ្ឍនភាពឆ្ពោះទៅរកការបោះឆ្នោត។រដ្ឋាភិបាលរបស់ប្រធានាធិបតីសហរដ្ឋអាមេរិកលោក ចូ បៃដិន បានរៀបចំដើម្បីផ្តល់ការបន្ធូរបន្ថយទណ្ឌកម្មដល់ប្រទេសវ៉េណេហ្ស៊ុយអេឡា ប្រសិនបើប្រទេសនេះ ខិតខំប្រឹងប្រែងដើម្បីស្តារលទ្ធិប្រជាធិបតេយ្យឡើងវិញនោះ។