ជប៉ុន ៖ ក្រុមហ៊ុនថាមពលអគ្គិសនីតូក្យូ (TEPCO) បាននិយាយថា ខ្លួនបានចាប់ផ្ដើមបញ្ចេញទឹកដែលធ្វើព្រឹត្តិកម្មហើយពីរោងចក្រថាមពលនុយក្លេអ៊ែរ Fukushima Daiichi។ ការបញ្ចេញលើកដំបូងនឹងធ្វើឡើងក្នុងរយៈពេល ១៧ថ្ងៃ។ ចំណែកឯកដំណើរការបង្ហូរទឹកនេះទាំងស្រុង អាចនឹងប្រើពេលយ៉ាងហោចណាស់ ៣០ឆ្នាំដែរ ដើម្បីបញ្ចប់គ្រប់យ៉ាង។

រដ្ឋាភិបាលបាននិយាយថាការបញ្ចេញនេះ ជារឿងចាំបាច់ ដើម្បីដកបន្ទុកសារធាតុមិនប្រើប្រាស់ពីរោងចក្រដែលបានរងការបំផ្លិចបំផ្លាញចំនួន ៣ដង បន្ទាប់ពីមានរញ្ជួយដី និងរលកយក្សស៊ូណាមិ កាលពីខែមីនា ឆ្នាំ២០១១។ ចាប់តាំងពីពេលនោះមក ទឹកភ្លៀង និងទឹកក្រោមដី បានលាយឡំជាមួយនឹងទឹកដែលប្រើសម្រាប់ធ្វើឲ្យត្រជាក់ឥន្ធនៈរលាយ នៅរោងចក្រនេះ។ ទឹកនេះត្រូវបានធ្វើប្រព្រឹត្តិកម្មរួចហើយ ដើម្បីយកសារធាតុវិទ្យុសកម្មចេញដោយភាគច្រើន ប៉ុន្តែនៅតែមានសារធាតុទ្រីចូល (Tritium)។

ទឹកដែលត្រូវបានធ្វើប្រព្រឹត្តិកម្មហើយនេះ កំពុងត្រូវបានបញ្ចេញ ដើម្បីកាត់បន្ថយកម្រិតទ្រីទីយ៉ូមមកត្រឹមប្រហែល១ភាគ៧នៃកម្រិត ដែលមានចែងនៅក្នុងគោលការណ៍ណែនាំរបស់អង្គការសុខភាពពិភពលោកសម្រាប់គុណភាពទឹក ដែលយកមកបរិភោគ។

ទឹកដែលបានធ្វើប្រព្រឹត្តិកម្មហើនេះ ត្រូវបានរក្សាទុកនៅក្នុងធុងជាង ១.០០០ធុង ដែលឥឡូវនេះ មានចំណុះផ្ទុកសរុបប្រហែល ១,៨លានតោន ឬ ៩៨ភាគរយនៃសមត្ថភាពផ្ទុករបស់រោងចក្រ។

មន្ត្រីក្រុមហ៊ុន TEPCO បានឲ្យដឹងនៅក្នុងសន្និសីទសារព័ត៌មានមួយ នៅព្រឹកថ្ងៃព្រហស្បតិ៍ថា នៅមុនការបញ្ចេញនេះ មានការវិភាគរកកំហាប់សារធាតុទ្រីចូល (Tritium) របស់ទឹក ហើយបានឃើញថា មានកម្រិត នៅចន្លោះ ៤៣ និង ៦៣បេគើរ៉ែល ក្នុងមួយលីត្រ ដោយចំនួនទាំងនេះ គឺទាបជាងស្តង់ដាររបស់រដ្ឋាភិបាល ដែលមានចំនួន ៦០.០០០បេគើរ៉ែល និងកម្រិតផ្ទាល់របស់ក្រុមហ៊ុន TEPCO ដែលមានចំនួន ១.៥០០បេគើរ៉ែល៕