អូស្ត្រាលី ៖ ក្រុមហ៊ុនអាកាសចរណ៍ Qantas Airways Ltd របស់ប្រទេសអូស្ត្រាលី បានប្រកាសពីប្រាក់ចំណេញដ៏ច្រើនរបស់ខ្លួន នៅថ្ងៃព្រហស្បតិ៍ (ទី២៤ ខែសីហា) នេះ ដែលចំណូលនេះ ត្រូវបានជំរុញដោយការវិលមកវិញនៃតម្រូវការធ្វើដំណើរដ៏ខ្លាំងក្លា ក្នុងយុគសម័យក្រោយជំងឺរាតត្បាត។

ក្នុងកិច្ចខិតខំប្រឹងប្រែង ដើម្បីបង្កើនបទពិសោធន៍របស់អតិថិជន ក្រុមហ៊ុនអាកាសចរណ៍ដ៏លេចធ្លោរបស់ប្រទេសនេះ បានប្រកាសការបញ្ជាទិញនូវយន្តហោះខ្នាតធំចំនួន ២៤គ្រឿង ដែលជាកិច្ចការចុងក្រោយនៃកម្មវិធីកែប្រែយន្តហោះឡើងវិញរបស់ក្រុមហ៊ុន ដែលអនុញ្ញាតឲ្យក្រុមហ៊ុនអាកាសចរណ៍នេះបន្តវិនិយោគលើការទិញយន្តហោះជាច្រើនបន្ថែមទៀត។

ក្រុមហ៊ុន Qantas ដែលត្រូវបានគេស្គាល់ថា Flying Kangaroo បានរាយការណ៍ពីប្រាក់ចំណេញប្រចាំឆ្នាំមុនការបង់ពន្ធចំនួន ២,៤៧ពាន់លានដុល្លារអូស្ត្រាលី (១,៦០ពាន់លានដុល្លារ) សម្រាប់ឆ្នាំសារពើពន្ធដែលបានបញ្ចប់នៅថ្ងៃទី៣០ ខែមិថុនា ដោយត្រឡប់ពីការខាតបង់ចំនួន១,៨៦ពាន់លានដុល្លារអូស្ត្រាលី (១,២ពាន់លានដុល្លារ) កាលពីឆ្នាំមុន និងជាប្រាក់ចំណេញពេញឆ្នាំលើកទីដំបូង គិតចាប់តាំងពីឆ្នាំ២០១៩។

ក្រុមហ៊ុនអាកាសចរណ៍ Qantas បាននិយាយថា សមត្ថភាពហោះហើរក្នុងស្រុករបស់ខ្លួន ត្រូវបានគេរំពឹងថា នឹងនៅតែខ្ពស់ជាងកម្រិតមុនមានជំងឺរាតត្បាតកូវីដ-១៩ នៅទូទាំងសារពើពន្ធឆ្នាំ២០២៤៕