បង់ក្លាដែស ៖ អ្នកស្លាប់ដោយសារជំងឺគ្រុនឈាមជាង៥០០នាក់ ត្រូវបានកត់ត្រា នៅក្នុងប្រទេសបង់ក្លាដែស គិតត្រឹមថ្ងៃពុធ ខណៈប្រទេសនៅអាស៊ីខាងត្បូងមួយនេះរកវិធីទប់ទល់ការផ្ទុះឡើងជាកំណត់ត្រានៃជំងឺកើតឡើងដោយសត្វមូស នៅឆ្នាំនេះ។

យោងតាមទិន្នន័យមកពី អគ្គនាយកដ្ឋាន នៃការិយាល័យសេវាសុខភាពបានឲ្យដឹងថា មនុស្សយ៉ាងហោចណាស់១៣នាក់បន្ថែមទៀតបានស្លាប់ដោយសារជំងឺគ្រុនឈាម ក្នុងរយៈពេល២៤ម៉ោងនៅមុនម៉ោង៨ព្រឹកម៉ោងក្នុងតំបន់កាលពីថ្ងៃពុធ នៅក្នុងប្រទេសបង់ក្លាដែស។  

ការិយាល័យសេវាសុខភាពបាននិយាយថា អ្នកជំងឺគ្រុនឈាម ២.០៧០នាក់ បានចូលសម្រាកព្យាបាលនៅមន្ទីរពេទ្យ ក្នុងអំឡុងពេល២៤ម៉ោងកាលពីថ្ងៃពុធ។ 

រហូតមកដល់ពេលនេះ ជំងឺគ្រុនឈាម បានឆក់យកជីវិតមនុស្សយ៉ាងហោចណាស់ ៥០៦នាក់ នៅឆ្នាំនេះ និង១០៦.៤២៩នាក់ បានឆ្លងជំងឺនេះ ដែលបណ្តាលឲ្យឆ្នាំនេះជាឆ្នំាមានមនុស្សស្លាប់ច្រើនបំផុត ចាប់តាំងពីជំងឺរាតត្បាតដែលបានកត់ត្រាដំបូង នៅក្នុងប្រទេសបង់ក្លាដែស ក្នុងឆ្នាំ២០០០។ 

អំឡុងរយៈពេល២៣ថ្ងៃដំបូង ក្នុងខែសីហា យោងតាមតួលេខដែលត្រូវបានរាយការណ៍ ដោយការិយាល័យសេវាសុខភាពស្ថិតក្រោមក្រសួងសុខភិបាល បានឲ្យដឹងថា ករណីជំងឺគ្រុនឈាម ៥៤.៥៩៧ករណី ត្រូវបានកត់ត្រានៅក្នុងប្រទេសនេះ បន្ទាប់ពីមនសុ្ស ៤៣.៨៥៤នាក់ បានឆ្លងជំងឺកើតឡើងដោយសត្វមូសកាលពីខែមុន។