វៀតណាម ៖ របាយការណ៍បានព្រមានថា ថ្មថើបគ្នាជានិមិត្តរូបរបស់វៀតណាម ស្ថិតនៅកណ្តាលឆកសមុទ្រហាឡុង ស្ថិតក្នុងហានិភ័យនៃការបាក់ស្រុត ។ 

 ឆកសមុទ្រហាឡុង ស្ថិតក្នុងខេត្តគ័ងនិញ មានកោះតូចៗរាប់រយកោះ ធ្វើឲ្យទាក់ទាញភ្ញៀវទេសចរ ៤លាននាក់កាលពីឆ្នាម ២០១៩ ។ 

 ថ្មភ្លោះ ដែលងើបចេញពីឆកសមុទ្រ ហើយទំនងជាប៉ះគ្នា ឬថើបគ្នានេះ គឺជាកន្លែងពេញនិយមជាងគេសម្រាប់ភ្ញៀវទេសចរ ។ 

 ប៉ុន្តែក្រុមអ្នកជំនាញ បានព្រមាននៅក្នុងរបាយការណ៍ខែកក្កដាថា នីវ៉ូទឹកសមុទ្រកើនឡើង និងទូកនេសាទធ្វើដំណើរជិតថ្មខ្លាំងពេក កំពុងបណ្តាលឲ្យថ្មភ្លោះនេះ សឹករេចរិល ។ 

 លោក ហូ ទៀនជុង មកពីវិទ្យាស្ថានភូគព្ភសាស្រ្ត និងធនធានរ៉ែ និយាយថា ការនេសាទខុសច្បាប់ និងទេសចរណ៍មិនមានការគ្រប់គ្រង ជួយពន្លឿនការសឹករេចរិលថ្មីថើបគ្នានេះ ។ 

 ស្របពេលដែលវិទ្យាស្ថានកំពុងស្រាវជ្រាវសម្រាប់ធ្វើរបាយការណ៍ ក្រុមការងារបានឃើញទូកទេសចរណ៍មួយគ្រឿង ឈប់នៅចម្ងាយប្រហែល១៩ម៉ែត្រប៉ុណ្ណោះពីថ្មថើបគ្នានេះ ។ 

 ក្រុមអ្នកជំនាញដែលបានឃើញស្នាមប្រេះជ្រៅលើថ្ម បានធ្វើការព្រមានថា វាអាចនឹងបាក់ស្រុត បើសិនជាវិធានការមិនត្រូវធ្វើ ដើម្បីការពារវាទេនោះ ៕