ក្រុមអ្នកធ្វើយុទ្ធនាការបរិស្ថាន បានបោះជំហានដំបូងឆ្ពោះទៅរកការជំទាស់តាមផ្លូវច្បាប់ដល់គណៈកម្មការអឺរ៉ុប ជុំវិញគោលនយោបាយកាត់បន្ថយការបំភាយឧស្ម័នផ្ទះកញ្ចក់ ដោយនិយាយថាគោលនយោបាយនោះខ្វះ «ចំណែកស្មើភាព» របស់អឺរ៉ុប ក្នុងការប្រយុទ្ធប្រឆាំងនឹងបម្រែបម្រួលអាកាសធាតុ។

បណ្តាញសកម្មភាពផ្នែកអាកាសធាតុ (CAN) អឺរ៉ុប និងបណ្តាញសកម្មភាពច្បាប់សកលមិនរកប្រាក់ចំណេញ បាននិយាយកាលពីថ្ងៃព្រហស្បតិ៍ថា ពួកគេបានស្នើសុំទីក្រុងព្រុចសែល របស់បែលហ្ស៊ិក ជាផ្លូវការ ឱ្យកែប្រែច្បាប់ដែលកំណត់ថា តើបណ្តាប្រទេសសហភាពអឺរ៉ុបត្រូវកាត់បន្ថយការបំភាយឧស្ម័នក្នុងវិស័យនានារួមទាំងកសិកម្ម និងដឹកជញ្ជូនលឿនប៉ុណ្ណា។

ច្បាប់សហភាពអឺរ៉ុបដែលកំពុងចោទជាសំណួរនោះ គឺជាគោលនយោបាយមួយក្នុងចំណោមគោលនយោបាយច្រើនជាងដប់ ដែលត្រូវបានបង្កើតឡើងដើម្បីកាត់បន្ថយការបំភាយឧស្ម័នសុទ្ធរបស់ប្លុកចំនួន៥៥% នៅឆ្នាំ២០៣០ ពីកម្រិតបំភាយកាលពីឆ្នាំ១៩៩០។ នោះគឺជាគោលដៅអាកាសធាតុ ដែលមានមហិច្ឆតាបំផុតនៃប្រទេសសេដ្ឋកិច្ចធំមួយ ប៉ុន្តែក្រុមអ្នកធ្វើយុទ្ធនាការចង់ឱ្យការកាត់បន្ថយការបំភាយឧស្ម័នកើនឡើងដល់៦៥%។

បណ្តាប្រទេសសហភាពអឺរ៉ុបទាំងអស់ បានអនុម័តលើគោលដៅនៃការបំភាយឧស្ម័នរួមកម្រិត៥៥% ដែលត្រូវបានកំណត់ជាច្បាប់។ សេចក្តីព្រាងមួយច្បាប់ដែលមើលឃើញដោយសារព័ត៌មាន រ៉យទ័រ កាលពីខែមុនបានបង្ហាញថា សហភាពអឺរ៉ុប រំពឹងថានឹងតួលេខលើសពីគោលដៅឆ្នាំ២០៣០ របស់ខ្លួន និងកាត់បន្ថយការបំភាយឧស្ម័ន៥៧% ប្រសិនបើប្រទេសនានាគោរពតាមគោលនយោបាយអាកាសធាតុដែលបានអនុម័តថ្មីៗនេះ៕