ធនាគារកណ្តាលរបស់វៀតណាម បានចុះហត្ថលេខាលើកិច្ចព្រមព្រៀងមួយ នៅថ្ងៃសុក្រ (ទី២៥ ខែសីហា) នេះ ដើម្បីជាផ្នែកមួយនៃគំនិតផ្តួចផ្តើមរបស់ប្រទេសអាស៊ីអាគ្នេយ៍ចំនួនប្រាំផ្សេងទៀត ក្នុងការបង្កើតយន្តការទូទាត់ឆ្លងព្រំដែនរវាងប្រទេសទាំងនេះ។

ប្រទេសវៀតណាមនឹងចូលរួមជាមួយឥណ្ឌូនេស៊ី ម៉ាឡេស៊ី ថៃ ហ្វីលីពីន និងសិង្ហបុរី ក្នុងការងារនេះ ដើម្បីភ្ជាប់ប្រព័ន្ធទូទាត់នីមួយៗរបស់ពួកគេ ក្នុងនោះរួមទាំងការប្រើប្រាស់ប្រព័ន្ធឃ្យូអរកូដ (ការឆ្លើយតបរហ័ស) សម្រាប់ប្រតិបត្តិការលក់រាយ។

កិច្ចព្រមព្រៀងនេះ ត្រូវបានធ្វើឡើងនៅក្នុងកិច្ចប្រជុំរបស់រដ្ឋមន្ត្រីហិរញ្ញវត្ថុនៃសមាគមប្រជាជាតិអាស៊ីអាគ្នេយ៍ (អាស៊ាន) ដែលមានសមាជិកទាំង១០ និងទេសាភិបាលធនាគារកណ្តាល នៅទីក្រុងហ្សារកាតារបស់ប្រទេសឥណ្ឌូនេស៊ី។

បន្ថែមពីលើនេះទៀត ឥណ្ឌូនេស៊ី ម៉ាឡេស៊ី និងថៃបានព្រមព្រៀងគ្នាក្នុងការជួយសម្រួលឲ្យមានប្រតិបត្តិការឆ្លងព្រំដែន នាពេលក្រោយ សម្រាប់ទុនសកម្មហិរញ្ញវត្ថុ ដូចជាភាគហ៊ុន និងប័ណ្ណរដ្ឋាភិបាល ជារូបិយប័ណ្ណ ក្នុងស្រុក។

ប្រទេសឥណ្ឌូនេស៊ីបានភ្ជាប់ប្រព័ន្ធទូទាត់របស់ខ្លួនដោយប្រើលេខឃ្យូអរកូដ ជាមួយថៃ និងម៉ាឡេស៊ីរួចហើយ ហើយមានបំណងភ្ជាប់ជាមួយសិង្ហបុរី នៅចុងឆ្នាំនេះ។

ប្លុកអាស៊ាន ដែលមានប្រជាជនជាង ៦០០លាននាក់ បានប្រឈមនឹងការពន្យារពេលជាច្រើនឆ្នាំ ក្នុងកិច្ចខិតខំប្រឹងប្រែងរបស់ខ្លួន ក្នុងការធ្វើសមាហរណកម្មសេដ្ឋកិច្ច ដែលមានតម្លៃសរុប ២,៣ពាន់ពាន់លានដុល្លារ តាមរយៈពាណិជ្ជកម្ម ការវិនិយោគ និងការតភ្ជាប់ទីផ្សារ និងការធ្វើឲ្យស្តង់ដារស៊ីចង្វាក់គ្នា និងនីតិវិធីគយ៕