ប្រធានាធិបតីចិនលោក Xi Jinpingបាននិយាយប្រាប់មេដឹកនាំអាហ្វ្រិកនៅជំនួបក្រៅកិច្ចប្រជុំកំពូលប្រទេសមានសេដ្ឋកិច្ចរីកចម្រើន BRICSកាលពីថ្ងៃព្រហស្បតិ៍ថា ចិននឹងដាក់ចេញបណ្តើមគំនិត ដើម្បីគាំទ្រឧស្សាហូនីយកម្មអាហ្វ្រិក និងការធ្វើទំនើបកម្មកសិកម្ម ។

លោក Xiបាននិយាយដោយពុំផ្តល់សេចក្តីលម្អិតថា ចិននឹងធ្វើឲ្យកាន់តែល្អប្រសើរធនធានរបស់ខ្លួនសម្រាប់កិច្ចសហប្រតិបត្តិការជាមួយអាហ្វ្រិក និងបណ្តើមគំនិតធុរកិច្ច ដើម្បីគាំទ្រអាហ្វ្រិក ក្នុងការបង្កើនវិស័យផលិតកម្មរបស់ពួកគេ និងសម្រេចឲ្យបានឧស្សាហូនីយកម្ម ក៏ដូចជាការបង្កើតឲ្យមានសេដ្ឋកិច្ចផ្សេងៗគ្នា ។

ការសន្យារបស់លោក Xi ត្រូវបានធ្វើឡើង ស្របពេលដែលកិច្ចប្រជុំកំពូល BRICS បិទបញ្ចប់ អំឡុងជំនួបជាមួយក្រុមមេដឹកនាំ និងក្រុមរដ្ឋមន្រ្តីមកពីសហភាពអាហ្វ្រិក និងប្រទេស ១១ផ្សេងទៀតរបស់អាហ្វ្រិក រួមទាំងប្រទេសលីប៊ី នីហ៊្សេរីយ៉ា និងសំប៊ី ។

ដោយឡែក ប្រធានាធិបតីអាហ្វ្រិកខាងត្បូងដែលជាប្រទេសម្ចាស់ផ្ទះ លោក Cyril Ramaphosaនិយាយថា ពួកយើងសូមថ្លែងអំណរគុណចិនសម្រាប់ការគាំទ្រការអភិវឌ្ឍន៍ហេដ្ឋារចនាសម្ព័ន្ធទ្វីបរបស់ពួកយើង ។

កាលពីថ្ងៃព្រហស្បតិ៍ម្សិលមិញ ក្រុមប្រទេស BRICSដែលរួមមានប្រេស៊ីល រុស្ស៊ី ឥណ្ឌា ចិន និងអាហ្វ្រិកខាងត្បូង បានយល់ព្រមទទួលយកសមាជិកថ្មីចំនួន ៦ប្រទេស ដែលរួមទាំងអេហ្ស៊ីប និងអេត្យូពី ៕