នាយករដ្ឋមន្ត្រីបាននិយាយកាលពីថ្ងៃសុក្រថា ភាពច្របូកច្របល់មួយរបស់អ្នកគាំទ្រកីឡា​ដែល​ព្យាយាម​ចូល​ទៅក្នុង​ពហុកីឡដ្ឋានជាតិរបស់ប្រទេសម៉ាដាហ្គាស្ការ សម្រាប់ពិធីបើកព្រឹត្តិការណ៍ Indian Ocean Island Games បានបណ្តាលឲ្យមនុស្ស១២ នាក់ស្លាប់ និង​របួស​ប្រមាណ​៨០​នាក់​។

ភ្លាមៗនេះ គេនៅពុំទាន់ដឹងច្បាស់ថា តើបណ្តាលមកពីមូលហេតុអ្វីនោះទេ ប៉ុន្តែកាល​ពី​ឆ្នាំ​២០១៩ យ៉ាង​ហោច​ណាស់​មនុស្ស ១៥ នាក់បានស្លាប់​នៅ​ក្នុង​ឧបទ្ទវ​ហេតុ​ស្រដៀង​គ្នា​នេះ​នៅ​កីឡដ្ឋាន Mahamasina ។

នាយករដ្ឋមន្ត្រីលោក Christian Ntsay បាននិយាយថា អ្នករងរបួស ១១ នាក់​ស្ថិត​ក្នុង​ស្ថាន​ភាព​ធ្ងន់​ធ្ងរ​។

ព្រឹត្តិការណ៍ Indian Ocean Island Games ត្រូវបាន​បង្កើត​ឡើង​ដោយ​គណៈកម្មាធិការ​អូឡាំពិក​អន្តរជាតិ (IOC) ក្នុងឆ្នាំ ១៩៧៧ ហើយរួមមានអត្តពលិកមកពីប្រទេសម៉រីស, កោះ​ស៊ីសែល, ប្រជុំកោះកូម៉ូរ៉ូ, ម៉ាដាហ្គាស្ការ, កោះម៉ាយ៉ូត,កោះរ៉េអ៊ុយញ៉ុងនិងប្រទេសម៉ាល់ឌីវ។