ឯកឧត្តម ជា សុមេធី រដ្ឋមន្រ្តីថ្មីក្រសួងសង្គមកិច្ច អតីតយុទ្ធជន និងយុវនីតិសម្បទា សម្រាប់​នីតិកាល​ទី​៧​នេះ បានលើកឡើងជាការប្ដេជ្ញាថា នឹងធ្វើការងារអោយបានខ្ជាប់ខ្ជួនជាមួយមន្រ្តីជំនាញ ដើម្បី​បម្រើ​អត្ថ​ប្រយោជន៍​ជូន​ប្រជាពលរដ្ឋ ។

ក្រសួងសង្គមកិច្ច អតីតយុទ្ធជន និងយុវនីតិសម្បទា ក៏ដូចជាក្រសួងជាច្រើនផ្សេងទៀតដែរ សម្រាប់​នីតិកាលទី៧ នេះ គឺមានការផ្លាស់ប្ដូរក្បាលម៉ាស៊ីនដឹកនាំ។ រដ្ឋមន្រ្តីថ្មី គឺឯកឧត្តម ជា សុមេធី អភិបាល​ខេត្ត​ព្រៃវែង ក្នុងនីតិកាលទី៦ បានមកកាន់តួនាទីជារដ្ឋមន្រ្តីក្រសួងសង្គមកិច្ច ជំនួសឯកឧត្តម វង សូត ដែល​ប្ដូរតួនាទីជា អនុប្រធានទី២ រដ្ឋសភា សម្រាប់អាណត្តិទី ៧នេះ។

ឯកឧត្តម ជា សុមេធី រដ្ឋមន្រ្តីថ្មី នៃក្រសួងសង្គមកិច្ច អតីតយុទ្ធជន និងយុវនីតិសម្បទា បាន​លើក​ឡើង​ក្នុង​ឱកាស​ជួប​សំណេះសំណាលជាលើកដំបូងជាមួយមន្រ្តីក្រសួងសង្គមកិច្ចថា កិច្ចការងារដែល​យើង​ធ្វើទៅ​បាន​ជោគជ័យ គឺទាល់តែដោយសារបងប្អូនយើងរួមគ្នា។ ឯកឧត្តមបន្តថា កិច្ចការសំខាន់​គឺ​សាមគ្គីភាព​ផ្ទៃក្នុង បទពិសោធន៍ការងារដែលនឹងនាំអោយពួកយើងធ្វើការងារបានជោគជ័យ។

ក្នុងដំណាក់កាលនេះ គឺពួកយើងនឹងបន្តធ្វើការងារទៅមុខទៀតជាមួយគ្នា ដើម្បី​ជួយ​ដល់​បងប្អូន​ប្រជា​ពលរដ្ឋ ព្រោះរាជរដ្ឋាភិបាលថ្មី ក្នុងនីតិកាលទី ៧ នេះ បានដាក់ចេញយុទ្ធសាស្ត្រ បញ្ចកោណ ដែល​មាន​គោល​ដៅ​យុទ្ធសាស្រ្តរហូតដល់ ៥ចំណុច។ នេះជាការបញ្ជាក់ថែម របស់ឯកឧត្តម ជា សុមេធី។

ក្នុងការមកកាន់តួនាទីថ្មីនេះ ឯកឧត្តម ក៏បានកោតសសើរចំពោះកិច្ចការងារ ក៏ដូចជា​សមិទ្ធផល​ជា​ច្រើន​ដែល​ឯកឧត្តម វង សូត អតីតរដ្ឋក្រសួងសង្គមកិច្ចសម្រេចបានកន្លងមក។ ក្នុងនោះរាប់បញ្ចូលទាំង ការ​កសាង​មណ្ឌលថែទាំ និងស្ដារនីតិសម្បទាជនមានវិបល្លាសស្មារតី មជ្ឈមណ្ឌល​ព្យាបាល​អ្នក​ញៀន​គ្រឿង​ញៀន​ នៅស្រុកកណ្ដាលស្ទឹង មជ្ឈមណ្ឌលជាតិព្យាបាល និងស្ដារនីតិសម្បទាអ្នកគ្រឿងញៀន នៅ កែវផុស ខេត្តព្រះសីហនុ មណ្ឌលថែទាំមនុស្សចាស់ដែលកំពុងសាងសង់ មណ្ឌល​យុវ​នីតិសម្បទា​ សម្រាប់​អានីតិជន​ទំនាស់​នឹងច្បាប់ ជាដើម។ លើសពីនេះ គឺការអនុវត្តបានយ៉ាងជោគជ័យ នូវកម្មវិធី​ជំនួយ​សង្គម​នានា ដែលបានដាក់ឱ្យអនុវត្តតាំងពីការរាតត្បាត កូវីដ-១៩ មកទល់បច្ចុប្បន្ន៕ អត្ថបទ៖ គឹមហុក