អាជ្ញាធរខេត្តកោះកុង បានចុះកំណត់ដែននេសាទគ្រែងឈាមឡើងវិញ បន្ទាប់ពីប្រជានេសាទ​ទាមទារសុំ​រក​ដំណោះស្រាយ ក្រោមហេតុផលអាស្រ័យផលមិនស្មើភាពគ្នា។ ទំនាស់ផលប្រយោជន៍លើការប្រមូល ផលនេសាទគ្រែងឈាម បានកើតឡើងជាយូរឆ្នាំមកហើយ ហើយទើបតែពេលនេះ ដែលអាជ្ញាធរខេត្ត មាន ចំណាត់ការកំណត់ដែននេសាទឱ្យត្រឹមត្រូវ ចៀសវាងជម្លោះរវាងពលរដ្ឋ និងពលរដ្ឋបន្តទៅទៀត ។

ក្រោយកិច្ចប្រជុំស្វែងយល់ពីបញ្ហាវិវាទទំនាស់ការអាស្រ័យផលគ្រែងឈាម របស់ប្រជានេសាទភូមិ ស្រែថ្មី និង​ភូមិស្រែត្រាវ ឃុំថ្មស ស្រុកបូទុមសាគរ លោកស្រី អ៊ី នារីនេត អភិបាលរងខេត្តកោះកុង បាន​បញ្ជាក់​កាល​ពី​រសៀលថ្ងៃទី២៥ ខែសីហា នេះថា ដើម្បីបញ្ចប់បញ្ហានេះបាន លុះត្រាតែចុះកំណត់ដែន ទឹករាក់ ឱ្យ​មាន​ការ​អាស្រ័យ​ផល​តម្លាភាព ឈរលើគោលការណ៍ឈ្នះឈ្នះទាំងអស់គ្នា ។ ទន្ទឹមមានការ បែង​ចែក​តំបន់​ដែន​នេសាទរួចរាល់ លោកស្រីអភិបាលរងខេត្ត ក៏ហាមប្រាមប្រជានេសាទ ប្រើប្រាស់ឧប ករណ៍​ខុស​ច្បាប់​ក្នុង​តំបន់អភិរក្ស ករណីបន្តបំពាន នឹងប្រឈមទោសទណ្ឌជាធរមាន ។

លោក អ៊ី ម៉េងលាង ប្រធានមន្ទីរកសិកម្ម រុក្ខាប្រមាញ់ និងនេសាទ ខេត្តកោះកុង បានលើកឡើងថា រាល់​សកម្មភាពពង្រីកស៊ុមគ្រែងឈាមលើផ្ទៃសមុទ្រ គឺគ្មានមន្ទីរស្ថាប័នណាចេញច្បាប់អនុញ្ញាត្តនោះទេ ដូច្នេះ​ការ​មាន​ទំនាស់គ្នា រវាងប្រជានេសាទ និងប្រជានេសាទ សុទ្ធតែខុសច្បាប់ទាំងអស់។ ប៉ុន្តែរដ្ឋបាល ខេត្ត និង​មន្ទីរ​ជំនាញ រមែងតែមានការយោគយល់ចំពោះការអាស្រ័យផលរបស់ប្រជានេសាទ ។

លោកបានបញ្ជាក់ថា ការនេសាទខ្យងស និងពង្រីកស៊ុមគ្រែងឈាម រដ្ឋបាលជលផលស្រុកបូទុម សាគរ តែង​ចុះបង្រ្កាបទប់ស្កាត់ជាប្រចាំ ពិសេសសមេឈ្នួញដែលឃុបឃិតទិញលក់នាំចេញទៅក្រៅខេត្ត។ តែ​ទោះ​យ៉ាង​ណា លោកជឿជាក់ថា ទំនាស់នេះ នឹងត្រូវបានបញ្ចប់ ក្រោយកំណត់ ដែននេសាទច្បាស់ លាស់ ។

កាលពីថ្ងៃទី២៤ ខែសីហា ប្រជានេសាទចំនួន២០០គ្រួសារ នៅឃុំថ្មស លើកគ្នាមកមុខសា លា​ខេត្ត​កោះកុង សុំជំនួយដោះស្រាយពីលោកជំទាវអភិបាលខេត្ត អំពីបាតុភាពមិនល្អមួយចំនួន ពាក់ព័ន្ធ នឹង​ការ​ទទួល​ផលគ្រែងឈាមមិនស្មើគ្នា ។

ប្រជានេសាទ បានដាក់ញត្តិសុំប្តឹងដកប្រធានសហគមន៍ និងមន្រ្តីជលផល ដែលមានទីស្នាក់នៅ ក្នុង​ភូមិ​ស្រែ​ថ្មី ដោយចោទថា បានបើកដៃឱ្យអ្នកមានលុយបោះបង្គោលវាទយកដែននេសាទ ធ្វើជាកម្មសិទ្ធិ ក្រោម​រូប​ភាព​ថា ចិញ្ចឹមគ្រែងឈាម ធ្វើឱ្យដែននេសាទក្នុងសហគមន៍ កាន់តែរួមតូចទៅៗ ប៉ះពាល់ដល់ កត្តា​ជីវ​ភាព​របស់​ពួកគេ៕ អត្ថបទ៖ឈឹម មករា