ក្រុមមន្ត្រីនៅរដ្ឋ Hawaii បានបញ្ចេញឈ្មោះមនុស្សចំនួន ៣៣៨នាក់ ដែលនៅតែបាត់ខ្លួនជាង ២សប្តាហ៍ បន្ទាប់​ពីមានចំហេះព្រៃដ៏មហន្តរាយបំផុតរបស់សហរដ្ឋអាមេរិក ក្នុងរយៈពេលជាង១សតវត្សរ៍ ដែល​បាន​ឆាប​ឆេះ​ទីក្រុងរមណីយដ្ឋាន នៅតំបន់ Lahaina។

បញ្ជីឈ្មោះដែលប្រមូលចងក្រងដោយ FBI រួមបញ្ចូលតែមនុស្ស ដែលមានឈ្មោះពេញត្រូវបានគេស្គាល់ និង​ដែលមានគេរាយការណ៍ថា បាត់ខ្លួន ហើយអាជ្ញាធរបានផ្ទៀងផ្ទាត់ព័ត៌មានទំនាក់ទំនង។ ក្នុង​ការ​ចេញ​ផ្សាយ​ឈ្មោះ កាលពីល្ងាចថ្ងៃព្រហស្បតិ៍ (ទី២៥ ខែសីហា) អាជ្ញាធរ បានជំរុញអ្នកណាដែលដឹងថា បុគ្គល​ណាម្នា​ក់នៅក្នុងបញ្ជីឈ្មោះ មានសុវត្ថិភាព ឬមានព័ត៌មាន​បន្ថែម​ដែល​អាច​ជួយ​កំណត់​ទីតាំង​របស់​អ្នក​ទាំង​នោះ ដើម្បីទាក់ទងមក FBI។

ក្រុមមន្ត្រីក៏បានលើកទឹកចិត្តឲ្យសាច់ញាតិបញ្ជូនឈ្មោះនរណាម្នាក់ផ្សេងទៀតដែលបាត់ខ្លួន និងផ្តល់គំរូ DNA ដើម្បីជួយកំណត់អត្តសញ្ញាណរបស់សព។ ចំនួនគ្រួសារដែលបានផ្តល់ DNA គឺទាប​ជាង​ការ​រំពឹង​ទុក​របស់​អាជ្ញាធររហូតមកដល់ពេលនេះ ដែលធ្វើឲ្យជួបការងារលំបាកកាន់តែខ្លាំង ក្នុង​ការ​បំពេញ​ការងារ​។

សូមបញ្ជាក់ថា ចំនួនអ្នកស្លាប់ដោយសារភ្លើងឆេះ កាលពីថ្ងៃទី៨ ខែសីហា នៅលើកោះ Maui មានចំនួន ១១៥នាក់ ប៉ុន្តែក្រុមមន្ត្រី បានប្រាប់ឲ្យដឹងថា តួលេខនេះទំនងជាកើនឡើងច្រើនទៀត ដោយ​ក្រុម​អ្នក​រុក​រក​នៅតែ​ពិនិត្យរកតាមគំនរផេះ។ អគ្គិភ័យនេះ គឺជាចំហេះព្រៃ ដែលបង្កឲ្យមានអ្នកបាត់បង់ជីវិតដ៏ធំបំផុត នៅ​សហរដ្ឋអាមេរិក គិតចាប់តាំងពីមានការឆាបឆេះព្រៃ ក្នុងឆ្នាំ១៩១៨ នៅរដ្ឋ Minnesota និង Wisconsin ដែលបានសម្លាប់មនុស្សជាង ៤៥០នាក់ នាពេលនោះ៕