យោងតាមសេចក្ដីរាយការណ៍ពីសារព័ត៌មាន PTI បានឲ្យដឹងថា យ៉ាងហោចណាស់មនុស្ស ៨នាក់ បានស្លាប់ និង ២០នាក់ផ្សេងទៀត បានរងរបួស បន្ទាប់ពី​អគ្គិភ័យ​បាន​ឆាបឆេះ​ខាង​ក្នុង​ទូ​រថភ្លើង ដែលឈប់សំចតនៅស្ថានីយ៍នៃតំបន់ Madurai ក្នុងពេលព្រឹកព្រហាមនាថ្ងៃសៅរ៍ (ទី២៦ ខែ​សីហា) នេះ។ អ្នកដំណើរទាំងអស់ បានធ្វើដំណើរមកដល់ពីទីក្រុង Lucknow នៃរដ្ឋ Uttar Pradesh។

ពាក់ព័ន្ធនឹងអគ្គិភ័យនេះ ក្រុមហ៊ុនអយស្ម័យយាន Southern Railway បានឲ្យដឹងថា អ្នកដំណើរ បាន​យក​តាមខ្លួននូវ «ស៊ីឡាំងឧស្ម័នរត់ពន្ធដោយខុសច្បាប់» ដែល​បណ្តាល​ឲ្យ​មាន​ការ​ផ្ទុះ​បង្ក​ជា​អគ្គិភ័យ​ឡើង។ នគរបាល បុគ្គលិកសេវាកម្មពន្លត់អគ្គភ័យ និងសង្គ្រោះ ក្រៅពីបុគ្គលិកផ្លូវដែក ដែល​ចូលរួមក្នុងការពន្លត់អណ្ដាតភ្លើងនោះ បានយក​សាកសព​ដែល​ត្រូវ​ភ្លើង​ឆេះ​ចេញ​ពី​បន្ទប់​នោះ​។

ការចេញផ្សាយរបស់ក្រុមហ៊ុនអយស្ម័យយាន Southern Railway បានឲ្យដឹងទៀតថា អណ្ដាត​ភ្លើងបានឆាបឆេះឡើងនៅម៉ោង ៥:១៥នាទីព្រឹកថ្ងៃសៅរ៍ ម៉ោងក្នុងស្រុក ហើយ​បុគ្គលិក​ពន្លត់​អគ្គិភ័យ ដែលបានមកដល់កន្លែងកើតហេតុនោះ នៅកន្លះម៉ោងក្រោយមក បាន​ពន្លត់​អណ្ដាត​ភ្លើង​នៅម៉ោង៧:១៥នាទីព្រឹក៕