អ្នកនាំពាក្យក្រសួងការបរទេសអាមេរិក បានឲ្យដឹងថា ក្រសួងការបរទេសនីហ្សេ បាន​ប្រាប់​រដ្ឋាភិបាល​សហរដ្ឋអាមេរិកថា រូបភាពនៃសំបុត្រ ដែលចែករំលែកតៗគ្នាតាមប្រព័ន្ធអ៊ិនធឺណិត ដោយ​អំពាវនាវឲ្យបុគ្គលិកការទូតអាមេរិកមួយចំនួនចាកចេញនោះ មិនមែន​ជា​ការ​ចេញ​ដោយ​ក្រសួង​របស់​ប្រទេសនេះនោះទេ។

បន្ទាប់ពីសារព័ត៌មាន AFP បានរាយការណ៍ថា ប្រទេសនីហ្សេ បានទុកពេល​ឲ្យ​ឯក​អគ្គ​រដ្ឋ​ទូត​អាមេរិក ៤៨ម៉ោង ដើម្បីចាកចេញពីប្រទេសអាហ្រ្វិកមួយនេះ អ្នកនាំពាក្យបាននិយាយថា៖ «គ្មាន​សំណើបែបនេះ ត្រូវបានធ្វើឡើងចំពោះរដ្ឋាភិបាលអាមេរិកនោះទេ»។

សារព័ត៌មាន AFP បានប្រាប់កាលពីថ្ងៃសុក្រ (ទី២៥ ខែសីហា) ថា ខ្លួនបានលុបការបង្ហោះ នៅ​មុន​នោះ ដែលថា មេដឹកនាំយោធារបស់ប្រទេសនីហ្សេ បាន​ទុក​ពេល​វេលា​ឲ្យ​ឯក​អគ្គ​រដ្ឋ​ទូត​អាល្លឺម៉ង់ និងសហរដ្ឋអាមេរិក ៤៨ម៉ោង ដើម្បីធ្វើការចាកចេញ ដោយសារសេចក្តីថ្លែងការណ៍ ដែល​ការរាយការណ៍យកជាឯកសារយោងនោះ ត្រូវបានប្រកាសថា «មិនត្រូវ​បាន​ធ្វើ​ឡើង​ដោយ​អាជ្ញាធរ​នោះ​ទេ​»។

កាលពីព្រឹកថ្ងៃសុក្រនោះ ក្រសួងការបរទេសនីហ្សេ បានចេញសេចក្តីថ្លែងការណ៍មួយ ដោយ​បញ្ជា​ឲ្យ​ឯក​អគ្គរដ្ឋទូតបារាំងលោក Sylvain Itte ចាកចេញពីប្រទេស ក្នុងរយៈពេល ៤៨ម៉ោង៕