ក្រសួងស្ថាប័នពាក់ព័ន្ធ កាលពីសៀល​ថ្ងៃទី២៥ ខែសីហា នេះ បានបើកកិច្ច​ប្រជុំ​ដើម្បី​ពិនិត្យ​វឌ្ឍនភាព​​ក្នុ​ងតំបន់អភិវឌ្ឍន៍រុនតាឯក​ និងពាក់ស្នែង​ ជាពិសេសជំរុញកិច្ចការ ដែលនៅសេសសល់​ និង​យកចិត្តទុក ដាក់លើបញ្ហាហេដ្ឋារចនាសម្ព័ន្ធផ្លូវថ្នល់​ ព្រម​ទាំង​ការ​គាំទ្រ​ដល់​ជីវភាព​រស់​នៅ​របស់​ប្រជាពលរដ្ឋនៅក្នុងតំ បន់នោះ ។

កិច្ចប្រជុំពិនិត្យវឌ្ឍនភាព​ក្នុងតំបន់អភិវឌ្ឍន៍រុនតាឯក​ និងពាក់ស្នែង ដឹកនាំដោយឯកឧត្តម សាយ សំអាល់ ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់​ និង​មាន​ការ​ចូល​រួមពី លោកជំទាវ​ ភឿង​ សកុណា​ រដ្ឋមន្រ្តីក្រសួងវប្បធម៌​ និងវិចិត្រ​ ថ្នាក់ដឹកនាំ​ក្រសួង​រៀបចំ​ដែន​ដី​ នគរូបនីយ កម្ម​ និងសំណង់​ ក្រសួងកសិកម្ម​ រុក្ខាប្រមាញ់​ និងនេសាទ​ ក្រសួង​សាធារណ​ការ និងដឹកជញ្ជូន​ ក្រសួងបរិ ស្ថាន ក្រសួងអភិវឌ្ឍន៍ជនបទ ក្រសួងរ៉ែ និងថាមពល ក្រសួង​ឧស្សាហ​កម្ម វិទ្យាសាស្រ្ត និងនវានុវត្តន៍​ កងវិស្វកម្មតេជោ​ ហ៊ុន​ សែន​ សៀមរាប​ ព្រមទាំងមន្ទីរ​ អង្គភាព​ពាក់ព័ន្ធជុំរិញខេត្ត ។

តាមរបាយការណ៍បានឲ្យដឹងថា ការងារចលនាប្រជាពលរដ្ឋ នៅក្នុងតំបន់រមណីយដ្ឋានអង្គរ មក ទល់​ពេលនេះ គឺប្រជាពលរដ្ឋ បានចាប់ឆ្នោតជ្រើសរើសដីឡូត៍ សរុប៩៨៣៦គ្រួសារ ។ ផ្ទៃដីសរុប សម្រាប់ ធ្វើប្រទានកម្មជូនប្រជាពលរដ្ឋ ដែលគ្រប់លក្ខខណ្ឌ និងស្ម័គ្រចិត្តចាកចេញពីតំបន់អង្គរ មាន​ទំហំ២៤៥៦ ហិកតា បែងចែកជា២០៩៥២ឡូត៍ ។

ចំពោះការស្ថាបនាហេដ្ឋារចនាសម្ព័ន្ធនៅតំបន់អភិវឌ្ឍន៍រុនតាឯក គឺបានចាក់ដីបំពេញទីតាំងជូនប្រ ជា​ពលរដ្ឋ បានស្ថាបនាផ្លូវគ្រួសក្រហម សាងសង់អនុវិទ្យាល័យ និងវិទ្យាល័យ មណ្ឌលសុខភាព ផ្សារ វត្ត មណ្ឌលរដ្ឋបាលស្រុក ដំឡើងបំពង់មេទឹកស្អាត ត​បណ្ដាញ​ចែក​ចាយ​ទឹកស្អាត​តាម​ផ្ទះ​ប្រជាពលរដ្ឋ ការងារ ដាំបង្គោល និងភ្ជាប់បណ្ដាញខ្សែភ្លើងមេ តបណ្ដាញ​ចែក​ចាយ​អគ្គិសនី​តាម​ផ្ទះ​ប្រជាពលរដ្ឋ ដំឡើងបង្គោល អង់តែនទូរស័ព្ទ។ រីឯការស្ថាបនា​ហេដ្ឋា​រចនា​សម្ព័ន្ធ​នៅ​តំបន់​អភិវឌ្ឍន៍​ពាក់ស្នែង គឺមានដូចជាការងារឈូស ឆាយ និងសម្អាតដីឡូតិ៍ ស្ថាបនាផ្លូវ​បេតុង​ក្រៅ​តំបន់​អភិវឌ្ឍន៍ប្រវែង ស្ថាបនាផ្លូវកៅស៊ូក្នុងតំបន់អភិវឌ្ឍន៍ សាងសង់មណ្ឌលសុខភាព សាលារៀន ផ្សារ មណ្ឌលរដ្ឋបាលស្រុក ការងារទឹកស្អាត អគ្គិសនី ។ល។

ឯកឧត្តមឧបនាយករដ្ឋមន្ត្រី សាយ សំអាល់ រដ្ឋមន្ត្រីក្រសួងរៀបចំដែនដី នគរូបនីយកម្ម និងសំ ណង់ បានណែនាំឱ្យក្រសួងវប្បធម៌ និងវិចិត្រសិល្បៈ ក៏ដូចជាអាជ្ញាធរជាតិអប្សរា គប្បី​ត្រូវ​សហការ​យ៉ាង ជិតស្និទ្ធិជាមួយអាជ្ញាធរខេត្តសៀមរាប ក្នុងការដោះស្រាយសម្របសម្រួល និងថែ​រក្សា​ការពារឱ្យបាននូវតំ បន់អភិរក្សក្នុងតំបន់រមណីយដ្ឋានអង្គរ គឺតំបន់១ តំបន់២ និងតំបន់៣ កុំឱ្យមានការរំលោភបំពានដោយ ខុសច្បាប់បន្តទៀត ដើម្បីរក្សា​ទុក​ជា​សម្បត្តិ​បេតិក​ភណ្ឌ​ដ៏​មាន​តម្លៃ​សម្រាប់ជាតិ និងពិភពលោកផងដែរ។ ម្យ៉ាងទៀត ឯកឧត្តម ក៏បានជំរុញ​ដល់​អាជ្ញាធរ​ខេត្ត​សៀមរាប ត្រូវពន្លឿនការចេញបណ្ណកម្មសិទ្ធិដីធ្លីជូន ប្រជាពលរដ្ឋ ៕ អត្ថបទ៖ ឈិត សាវី