នាយករដ្ឋមន្រ្តីឥណ្ឌា លោក Narendra Modi បានទៅ​ទស្សនកិច្ច​នៅ​អង្គការ​ស្រាវជ្រាវ​អវកាស​ឥណ្ឌា (ISRO) បន្ទាប់ពីបេសកកម្មរបស់យានអវកាស Chandrayaan 3 (ចន្ទ្រាយាន-៣) របស់​ប្រទេស ទៅកាន់ពភព្រះចន្ទ ទទួលបានជោគជ័យ ហើយលោកបាននិយាយថា កន្លែង​ដែល​យាន​នេះ ចុះចតនៅលើផ្ទៃព្រះចន្ទនោះ នឹងត្រូវបានគេស្គាល់ថា ជា «Shivshakti» (មហិទ្ធិ​ឫទ្ធិ៍​របស់​ព្រះសិវៈនៃសាសនាហិណ្ឌូ)។

លោក Modi បាននិយាយបន្ថែមទៀតថា ថ្ងៃទី២៣ ខែសីហា នឹងត្រូវបានប្រារព្ធជាថ្ងៃអវកាសជាតិ (National Space Day) នៅប្រទេសឥណ្ឌា ហើយកន្លែង ដែលត្រូវ​បាន​បន្សល់​ដាន​ដោយ​យាន​អវកាស Chandrayaan 2 (ចន្ទ្រាយាន-២) នឹងត្រូវបានគេស្គាល់ថា ជា «Tiranga» (៣ពណ៌) ។

ការចុះចតដោយជោគជ័យរបស់យានអវកាសរបស់ឥណ្ឌា នៅលើប៉ូលខាងត្បូងនៃភពព្រះចន្ទ ដែល​មិនទាន់មានការរុករក កាលពីថ្ងៃពុធ (ទី២៣ ខែសីហា) ធ្វើឲ្យប្រទេស​មួយ​នេះ​ក្លាយ​ជា​ប្រទេស​ដំបូង​គេដែលសម្រេចបានបែបនេះ ដោយកើតឡើងត្រឹមតែប៉ុន្មានថ្ងៃប៉ុណ្ណោះ បន្ទាប់​ពី​យាន​អវកាស Luna-25 (លូណា-២៥) របស់រុស្ស៊ី បានបរាជ័យ ក្នុងបេសកកម្មស្រដៀងគ្នានេះ។

ការចុះចតដោយសម្ពាធស្រាល ដែលយកតាមតម្រាយានចុះចត បន្ទាប់ពី​ការ​ប៉ុន​ប៉ង​មិន​បាន​សម្រេច កាលឆ្នាំ២០១៩ បានបង្កើតឲ្យមានភាពរីករាយ និងការអបអរសាទរពីគ្រប់ទិសទី នៅ​ក្នុង​ប្រទេស ដែលមានចំនួនប្រជាជនច្រើនបំផុតេបស់ពិភពលោកមួយនេះ៕