យានអវកាស SpaceX Dragon ដែលមានអវកាសយានិក ៤នាក់ ជិះនៅក្នុងនោះ ត្រូវ​បាន​បាញ់​បង្ហោះ​ពីទីក្រុង Cape Canaveral រដ្ឋ Florida សហរដ្ឋអាមេរិក នៅថ្ងៃសៅរ៍ (ទី២៦ ខែសីហា) នេះ ហើយធ្វើដំណើរឆ្ពោះទៅកាន់ស្ថានីយអវកាសអន្តរជាតិ (ISS)។

យានអវកាស Crew-7 បានហោះឡើង នៅវេលាម៉ោង ៧:២៦នាទី ម៉ោងសកល ដោ​យ​មាន​ដឹក​អវកាស​យានិករបស់អង្គការណាសា (NASA) អ្នកនាង Jasmin Moghbeli អវកាសយានិក​របស់ ESA (ទីភ្នាក់ងារអវកាសអឺរ៉ុប) លោក Andreas Mogensen អវកាសយានិករបស់ JAXA (ទីភ្នាក់ងាររុករកអវកាសជប៉ុន) លោក Satoshi Furukawa និងតារាវិទូរបស់ Roscosmos (ទីភ្នាក់ងារអវកាសរុស្ស៊ី) លោក Konstantin Borisov។

យោងតាមអង្គការ NASA បានឲ្យដឹងថា បន្ទាប់ពីការបំបែកខ្លួន នៅក្នុងលំហ យាន​ចម្លង​ដំណាក់​កាលទី​មួយ Falcon 9 បានចុះចតដោយជោគជ័យ នៅស្ថានីយកងកម្លាំងអវកាស Cape Canaveral។

យានបេសកកម្ម Crew-7 ត្រូវបានគេរំពឹងថា នឹងទៅដល់ស្ថានីយ ISS បន្ទាប់ពី​ចំណាយ​ពេល​ធ្វើ​ដំណើរ​រយៈពេល ២២ម៉ោង ហើយយោងតាមអង្គការ NASA បានឲ្យដឹងថា ពេលទៅ​ដល់​គោល​ដៅ ក្រុមនាវិកទាំងនោះ នឹងធ្វើការស្រាវជ្រាវ និងពិសោធន៍វិទ្យាសាស្ត្រនៅស្ថានីយ ISS៕