មន្ត្រីជាន់ខ្ពស់មកពីគណបក្សភឿថៃ (Pheu Thai) កាលពីថ្ងៃសុក្រ (ទី២៥ ខែសីហា) បាន​ប្រាប់​ទីភ្នាក់ងារសារព័ត៌មាន Reuters ថា នាយករដ្ឋមន្ត្រីថ្មីរបស់ប្រទេសថៃលោក សេដ្ឋា ថាវីស៊ីន (Srettha Thavisin) នឹងកាន់តួនាទីបន្ថែមជារដ្ឋមន្ត្រីហិរញ្ញវត្ថុ នៅក្នុង​គណៈរដ្ឋមន្ត្រី​របស់​លោក​។

មន្ត្រីទាំង ២រូប បានបដិសេធមិនបង្ហាញអត្តសញ្ញាណរបស់ខ្លួនទេ ដោយសារការពិភាក្សា មិន​ត្រូវ​បាន​បញ្ចេញ​ជាសាធារណៈ។ គណបក្សភឿថៃ មិនបានឆ្លើយតបភ្លាមៗនោះឡើយ ចំពោះសំណើ​សុំការ​អត្ថាធិប្បាយ។

គួរបញ្ជាក់ដែរថា មហាសេដ្ឋីអចលនទ្រព្យលោក សេដ្ឋា វ័យ ៦១ឆ្នាំ ដែលទើបបាន​ចូល​ប្រឡូក​ក្នុង​ឆាក​នយោបាយ កាលពីប៉ុន្មានខែមុននោះ ត្រូវបានគេរំពឹងថា នឹងជ្រើស​រើស​គណៈ​រដ្ឋមន្ត្រី​ពី​គណបក្ស​សម្ព័ន្ធភាពទាំង ១១ របស់លោក នៅសប្តាហ៍ខាងមុខ បន្ទាប់ពីលោក​ទទួល​បាន​អនុម័ត​ឲ្យ​ក្លាយ​ជា​នាយករដ្ឋមន្ត្រីដោយសភា កាលពីថ្ងៃអង្គារដើមសប្ដាហ៍នេះ។

ហើយប្រភពពីរដ្ឋាភិបាលដែលដឹងអំពីបញ្ហានេះ ក៏បានបញ្ជាក់ដែរថា លោក សេដ្ឋា នឹងធ្វើជា​រដ្ឋមន្ត្រី​ហិរញ្ញវត្ថុ។

លោក សេដ្ឋា កាលពីថ្ងៃសុក្រ បាននិយាយថា ការកំណត់សមាសភាពគណៈរដ្ឋមន្ត្រី នឹងត្រូវបញ្ចប់ ក្នុងរយៈពេលពី ២ ទៅ ៣ថ្ងៃ ហើយថា គណបក្សភឿថៃរបស់លោក បាន​សម្រេច​ចិត្ត​ហើយ​ថា តើអ្នកណានឹងត្រូវកាន់តំណែងអ្វី ក្នុងជួររដ្ឋាភិបាល។

សូបញ្ជាក់ថា គណបក្សភឿថៃ ដែលទទួបានការគាំទ្រលំដាប់ទី២ ក្នុងការបោះឆ្នោតខែឧសភា កំពុង​ដឹកនាំការបង្កើតរដ្ឋាភិបាលមួយ បន្ទាប់ពីកិច្ចខិតខំប្រឹងប្រែងមុន ពីសំណាក់​គណបក្ស​ឈ្នះ​ឆ្នោត​ គឺគណបក្សបោះជំហានទៅមុខ (Move Forward) បានបរាជ័យ ដោយសារ​តែមា​ន​ការ​ជំទាស់​យ៉ាង​ខ្លាំងក្លាពីក្រុមអភិរក្ស នៅក្នុងការបោះឆ្នោតនៃសភាទាំង២៕