នាព្រឹកថ្ងៃសៅរ៍ ទី២៦ ខែសីហា ឆ្នាំ២០២៣ សមាគមគ្រូបង្រៀនខ្មែរឥស្លាម (CAMTA) បាន​រៀបចំ​ពិធីសំណេះសំណាលជាមួយថ្នាក់ដឹកនាំ នាយកអប់រំ បញ្ញវន្តក្នុងវិស័យអប់រំឥស្លាម ទូទាំង​រាជធានី ខេត្ត  និងឯកឧត្តម លោកជំទាវ ថ្នាក់ដឹកនាំ សរុបទាំងអស់មានចំនួន៤៥០នាក់ ដោយ​មាន​ការ​ចូលរួមក្រោមអធិបតី ដ៏ខ្ពង់ខ្ពស់ពីសំណាក់ ឯកឧត្តមបណ្ឌិតអូស្មាន ហាស្សាន់ ទេស​រដ្ឋ​មន្ត្រី ទទួលបន្ទុកបេសកកម្មពិសេស និង​ជា​ប្រធាន​ក្រុម​ប្រឹក្សាភិបាល​សមាគម​គ្រូ​បង្រៀន​ខ្មែរ​ឥស្លាម នៅឯមជ្ឈមណ្ឌលម៉ូឌែន៥ រាជធានីភ្នំពេញ។

ជំនួបនេះ មានគោលបំណង ដើម្បីរក្សាទំនាក់ទំនងរវាងថ្នាក់ដឹកនាំ និងនាយកអប់រំ បញ្ញវន្ត​ក្នុង​វិស័យ​អប់រំឥស្លាម ក៏ដូចជាជម្រាបជូនពីផែនការសកម្មភាពការងារ នាពេលខាងមុខ និង​អបអរ​សាទរ​នៃកា​រទទួលបាននូវនាយករដ្ឋមន្ត្រីថ្មីគឺ ឯកឧត្តមកិត្តិទេសាភិបាលបណ្ឌិត ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា សម្រាប់នីតិកាលទី៧។ លើសពីនេះទៅទៀត ដើម្បី​ពិភាក្សា លើកពី​បញ្ហា​ប្រឈម​អំពី​វិស័យ​អប់រំ​ឥស្លាម​ និង​បង្ហាញ​ពី​វឌ្ឍនភាព​ការងារ​របស់​សហគមន៍​ឥស្លាម ក៏ដូចជាសមាគមគ្រូបង្រៀនខ្មែរឥស្លាមផ្ទាល់ក្នុងរយៈពេល៥ឆ្នាំ។