ភ្នំពេញ៖ ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ និងថ្នាក់ដឹកនាំ បាន​ទទួល​ជួបជាមួយលោកជំទាវ Carmen Moreno ឯកអគ្គរដ្ឋទូតវិសាមញ្ញ និងពេញ​សមត្ថភាព នៃ​សហភាពអឺរ៉ុប (EU) ប្រចាំនៅកម្ពុជា ដែលនឹងចប់អាណត្តិបេសកកម្មការទូត នៅ​ទីស្តី​ការក្រសួង។

ក្រសួងកសិកម្ម រុក្ខាប្រមាញ់ និងនេសាទ នៅរសៀលថ្ងៃទី២៦ សីហា ឆ្នាំ២០២៣នេះ បាន​ឲ្យដឹង​ថា ក្នុងជំនួបនេះ ឯកឧត្តមរដ្ឋមន្ត្រី បាន​ថ្លែង​អំណរ​គុណ​សម្រាប់​កិច្ច​សហប្រតិបត្តិការ​ល្អ​ក្នុង​ការ​ចូល​រួម​គាំទ្រ និងអភិវឌ្ឍវិស័យកសិកម្មកម្ពុជាឱ្យមានភាពប្រសើរឡើង។

ឯកឧត្តម ឌិត ទីណា បានជម្រាបជូនភ្ញៀវថា ក្រសួង​បាន​និង​កំពុង​យក​ចិត្ត​ទុក​ដាក់​ក្តាប់​ស្ថានភាព​កសិកម្ម​ទាំង​ទិដ្ឋភាពបច្ចេកទេស និងនយោបាយគៀងគរឱ្យមានការចូលរួមពីវិស័យឯកជន និង​ដៃគូរ​អភិវឌ្ឍន៍ ដើម្បីជំរុញកម្មវិធីផ្សព្វផ្សាយកសិកម្មឱ្យកាន់តែខិតជិតកសិករ និង​ក្រុម​អ្នក​ផលិត​មាន​ភាព​ម្ចាស់ការ ធ្វើឱ្យប្រសើរឡើងនូវខ្សែច្រវាក់តម្លៃ ធានាបាននូវ​សន្តិសុខ​ស្បៀង និង​ស្ថិរភាព​តម្លៃ​នៅទូ​ទាំងប្រទេស ព្រមទាំងការអនុវត្តយុទ្ធសាស្ត្រកាត់បន្ថយថ្លៃដើម កាត់​បន្ថយការ​ចំណាយ​ផ្សេង​ៗ ដើម្បីជួយឱ្យកសិករទទួលបានផលចំណេញ មានប្រសិទ្ធភាព និងនិរន្តរភាពសេដ្ឋកិច្ច ក្នុ​ង​ការចូលរួមជំរុញសេដ្ឋកិច្ចប្រទេសកម្ពុជា ឱ្យក្លាយប្រទេសដែលមានចំណូលមធ្យមកម្រិតខ្ពស់ នៅ​ឆ្នាំ២០៣០៕