ហ្គាបុង ៖ រដ្ឋាភិបាលនៃប្រទេសហ្គាបុង បានបិទការចូលប្រើអ៊ីនធឺណិត និងបានដាក់បម្រាមគោចរកាលពីថ្ងៃសៅរ៍ (២៦ សីហា) បន្ទាប់ពីមានការពន្យារពេលដ៏សំខាន់នៅក្នុងការបោះឆ្នោតសកល ខណៈដែលក្រុមប្រឆាំងបានស្រែកតវ៉ាចំពោះការស្ទង់មតិ ដែលពួកគេសង្ឃឹមថានឹងបញ្ឈប់អណត្តិរបស់ប្រធានាធិបតីហ្គាបុង លោក Ali Bongo ក្នុងការបន្តការកាន់កាប់រយៈពេល៥៦ឆ្នាំនៃអំណាចគ្រួសាររបស់លោក។

ប្រទេសអាហ្រ្វិកកណ្តាលមួយនេះ កំពុងរៀបចំការបោះឆ្នោតប្រធានាធិបតី នីតិបញ្ញត្តិ និងការបោះឆ្នោតក្នុងស្រុក ក្នុងពេលដំណាលគ្នាជាលើកដំបូង ជាមួយនឹងភាពតានតឹងដែលកំពុងកើនឡើងខ្ពស់ ស្របពេលមានការភ័យខ្លាចថា ការផ្លាស់ប្តូរប្រព័ន្ធបោះឆ្នោត អាចធ្វើឱ្យមានការសង្ស័យអំពីភាពស្របច្បាប់នៃលទ្ធផលបោះឆ្នោត និងបង្កភាពចលាចលក្នុងប្រទេស។

លោក Bongo វ័យ៦៤ឆ្នាំ ដែលបានបន្តតំណែងពីឪពុករបស់លោកឈ្មោះ Omar ក្នុងឆ្នាំ២០០៩ កំពុងព្យយាមបន្តអាណត្តិទី៣ប្រឆាំងនឹងគូប្រជែង១៨រូប ដែលក្នុងនោះគូប្រជែង៦រូបបានគាំទ្របេក្ខជនប្រធានាធិបតីរួមគ្នា ក្នុងកិច្ចខិតខំប្រឹងប្រែងដើម្បីបង្រួមការប្រកួតប្រជែង។ 

អ្នកយកព័ត៌មាន រ៉យទ័រ ម្នាក់ បាននិយាយថា ការបោះឆ្នោតនោះនឹងចាប់ផ្តើមនៅម៉ោង ០៧:០០ (ម៉ោងសកល) ប៉ុន្តែយ៉ាងហោចណាស់មានការិយាល័យបោះឆ្នោតចំនួន៥នៅក្នុងរដ្ឋធានី Libreville បានឃើញអ្នកបោះឆ្នោតរង់ចាំជាច្រើនម៉ោងសម្រាប់ការចាប់ផ្ដើមបោះឆ្នោត៕