កូរ៉េខាងជើង ៖ ប្រព័ន្ធផ្សព្វផ្សាយរដ្ឋបានរាយការណ៍នៅថ្ងៃអាទិត្យ (២៧ សីហា) នេះថា ប្រទេសកូរ៉េខាងជើងបានអនុម័តការវិលត្រឡប់របស់ពលរដ្ឋរបស់ខ្លួនដែលនៅបរទេស បន្ទាប់ពីមានការរឹតបន្តឹងព្រំដែនដ៏តឹងរ៉ឹងជាច្រើនឆ្នាំក្នុងអំឡុងពេលជំងឺរាតត្បាតកូវីដ១៩។

នៅក្នុងសេចក្តីថ្លែងការណ៍ដែលធ្វើឡើងដោយទីភ្នាក់ងារសារព័ត៌មាន KCNA បានឲ្យដឹងថា ទីស្នាក់ការការពារការរាតត្បាតគ្រាអាសន្នរបស់រដ្ឋបាននិយាយកាលពីថ្ងៃសៅរ៍ (២៦ សីហា) ថា ការអនុម័តនេះគឺស្របតាមការកែតម្រូវកម្រិតប្រឆាំងការរីករាលដាលរបស់ខ្លួនបន្ទាប់ពី «ស្ថានភាពជំងឺរាតត្បាតទូទាំងពិភពលោកបានធូរស្រាល»។

សេចក្តីថ្លែងការណ៍នោះបានបន្ថែមថា អ្នកដែលត្រលប់មកវិញ នឹងត្រូវដាក់ឱ្យស្ថិតនៅក្រោមការសង្កេតផ្នែកវេជ្ជសាស្ត្រត្រឹមត្រូវនៅទីតាំងធ្វើចត្តាឡីស័ក សម្រាប់រយៈពេលមួយសប្តាហ៍។ 

ការប្រកាសនេះ ធ្វើឡើងប៉ុន្មានថ្ងៃបន្ទាប់ពីជើងហោះហើរ Air Koryo ពីទីក្រុងព្យុងយ៉ាងបានចុះចតនៅទីក្រុងប៉េកាំងជាលើកដំបូង ចាប់តាំងពីការបិទខ្ទប់ដោយសារជំងឺរាតត្បាតបានចាប់ផ្តើមក្នុងឆ្នាំ២០២០មក ស្របពេលមានការបើកឡើងវិញដ៏យឺតយ៉ាវ នៃប្រទេសមួយក្នុងចំណោមប្រទេសផ្ដាច់ខ្លួនខាងនយោបាយ និងសេដ្ឋកិច្ចបំផុតរបស់ពិភពលោកមួយនេះ៕