ជប៉ុន ៖ ទីក្រុងតូក្យូបានជំរុញទីក្រុងប៉េកាំងឱ្យ «ធានាសុវត្ថិភាពប្រជាជនជប៉ុននៅក្នុងប្រទេសចិន» បន្ទាប់ពីរលកនៃការយាយីតាមទូរស័ព្ទ ដែលផ្តោតលើអាជីវកម្មនៅក្នុងប្រទេសជប៉ុន បង្កឡើងដោយការបង្ហូរសំណល់ទឹកដ៏ចម្រូងចម្រាសពីរោងចក្រហ្វ៊ូគូស៊ីម៉ា។

ខណៈពេលដែលប្រទេសជប៉ុនអះអាងថា ការបញ្ចេញទឹកដែលត្រូវបានធ្វើប្រព្រឹត្តកម្មរួចគឺមានសុវត្ថិភាព ដែលគាំទ្រដោយអង្គភាពឃ្លាំមើលនុយក្លេអ៊ែររបស់អង្គការសហប្រជាជាតិនោះ ប្រទេសចិនបានជំទាស់យ៉ាងម៉ឺងម៉ាត់ និងហាមឃាត់ការនាំចូលអាហារសមុទ្ររបស់ជប៉ុនទាំងអស់ដោយនិយាយថា ការបញ្ចេញសំណល់ទឹកនោះបំពុលមហាសមុទ្រ។

បណ្ដាអាជីវកម្ម និងក្រុមជនជាតិជប៉ុន ចាប់ពីសាលប្រគុំតន្ត្រីក្នុងទីក្រុងតូក្យូ រហូតដល់អាងចិញ្ចឹមត្រីមួយនៅភាគខាងជើងទីក្រុង Iwate បានរាយការណ៍ថា ពួកគេបានចាប់ផ្តើមទទួលការហៅទូរស័ព្ទជាច្រើនពីអ្នកនិយាយភាសាចិន ដែលបណ្ដាលឲ្យពួកគេមានការលំបាកក្នុងការរស់នៅ និងធ្វើអាជីវកម្ម។

ក្រសួងការបរទេសជប៉ុនបាននិយាយនៅក្នុងសេចក្តីថ្លែងការណ៍មួយកាលពីល្ងាចថ្ងៃសៅរ៍ថា លោក Hiroyuki Namazu អ្នកការទូតជាន់ខ្ពស់ជប៉ុនទទួលបន្ទុកកិច្ចការអាស៊ី និងទ្វីបអូសេអានី បានសម្តែងការសោកស្តាយចំពោះបញ្ហាទាំងនេះ ហើយបានប្រាប់មន្ត្រីជាន់ខ្ពស់នៅស្ថានទូតចិនក្នុងទីក្រុងតូក្យូ ឱ្យអំពាវនាវឱ្យមានភាពស្ងប់ស្ងាត់នៅក្នុងប្រទេសចិន។ លោក Namazu បានប្រាប់មន្ត្រីស្ថានទូតចិនថា បញ្ហាស្រដៀងគ្នានេះក៏បានកើតឡើងនៅក្នុងប្រទេសចិនប្រឆាំងនឹងមូលដ្ឋានរបស់ជប៉ុនផងដែរ នេះបើយោងតាមសេចក្តីថ្លែងការណ៍៕