ហ្វីលីពីន ៖ ក្រុមមន្ត្រីជួយសង្គ្រោះបាននិយាយនៅថ្ងៃអាទិត្យ (២៧ សីហា) នេះថា មនុស្សរាប់រយនាក់បានភៀសខ្លួនចេញពីលំនៅឋានរបស់ពួកគេ ខណៈទឹកជំនន់ដែលបណ្តាលមកពីព្យុះទីហ្វុង Saola បានបោកបក់កាត់ភូមិជនបទភាគច្រើននៅភាគឦសានប្រទេសហ្វីលីពីន។ 

ព្យុះ Saola បានបោកបក់កាត់ផ្នែកភាគឦសាននៃកោះ Luzon ពេញមួយយប់ថ្ងៃសៅរ៍ ដោយនាំមកនូវខ្យល់បក់ល្បឿន១៨៥គីឡូម៉ែត្រក្នុងមួយម៉ោង ក្នុងចម្ងាយ១២៥គីឡូម៉ែត្រពីទីក្រុង Tuguegarao ដែលជាទីក្រុងដែលមានប្រជាជនប្រហែល ១៦០.០០០នាក់។

លោក Ruelie Rapsing ដែលជាមន្ត្រីជួយសង្គ្រោះក្នុងខេត្ត Cagayan ប្រទេសហ្វីលីពីន បានប្រាប់សារព័ត៌មាន AFP ថា មនុស្សសរុបចំនួន ៣៨៨នាក់ត្រូវបានជម្លៀសចេញ ដោយសារតែទឹកជំនន់នៅក្នុងទីក្រុងចំនួនបួនរបស់ខេត្តCagayan ដោយទឹកនៅក្នុងទីក្រុងចំនួនពីរផ្សេងទៀតក៏កើនឡើងផងដែរ។ 

លោកបានបន្ថែមថា មានការដាច់ចរន្តអគ្គិសនីរីករាលដាលពាសពេញខេត្តដែលមានប្រជាជនចំនួន១,២លាននាក់នេះផងដែរ ដោយសារតែការដាច់ខ្សែភ្លើង ប៉ុន្តែមិនមានអ្នកស្លាប់ ឬសញ្ញានៃការខូចខាតធ្ងន់ធ្ងរនោះទេ។

សេវាអាកាសធាតុហ្វីលីពីនបាននិយាយថា ការគំរាមកំហែងចម្បងគឺមកពីភ្លៀងធ្លាក់ខ្លាំង ដែលអាចបង្កជាទឹកជំនន់ភ្លាមៗ ឬបំណាក់ដី។ ហ្វីលីពីនរងការវាយប្រហារដោយព្យុះធំៗចំនួន២០ករណី ជារៀងរាល់ឆ្នាំ ដែលសម្លាប់មនុស្សរាប់រយនាក់ និងបានធ្វើបណ្ដាតំបន់ដ៏ធំនៅប្រទេសនេះស្ថិតក្នុងភាពក្រីក្រជារៀងរហូតផងដែរ៕