ភ្នំពេញ៖ លោកជំទាវបណ្ឌិតសភាចារ្យ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ នាព្រឹកថ្ងៃទី២៨ ខែសីហា ឆ្នាំ២០២៣នេះ ​បានអនុញ្ញាតឲ្យលោក ​Zhai Yulong អគ្គនាយករង នៃនាយកដ្ឋានផ្សព្វផ្សាយនៃគណៈកម្មាធិការបក្សខេត្តយូណាន CPC និងជាអគ្គនាយក​រដ្ឋបាល​ភាព​យន្តយូណាន នៃសាធារណរដ្ឋប្រជាមានិតចិន​ ជាមួយនិងគណៈប្រតិភូ ចូលជួបសម្តែងការគួរសម និងពិភាក្សាការងារ លើវិស័យវប្បធម៌។

ឆ្លៀតក្នុងឱកាសខួបអនុស្សាវរីយ៍លើកទី៦៥ឆ្នាំ នៃទំនាក់ទំនងការទូតរវាងប្រទេសទាំងពីរ កម្ពុជា-ចិន លោក Zhai Yulong បានជម្រាបជូនលោកជំទាវរដ្ឋមន្រី្តថា លោកបានដឹកនាំគណៈប្រតិភូ និងក្រុម​សិល្បៈខេត្តយូណាន មកបំពេញទស្សនកិច្ចក្នុងព្រះរាជាណាចក្រកម្ពុជា ដើម្បីរៀបចំ​ព្រឹតិ្តការណ៍​ជាច្រើន ដើម្បីអបអរសាទរខួបអនុស្សាវរីយ៍លើកទី៦៥ឆ្នាំ និងសូមថ្លែងអំណរគុណដល់​ថ្នាក់ដឹកនាំក្រសួងវប្បធម៌ ដែលបានទទួលស្វាគមន៍យ៉ាងកក់ក្តៅ។

នាពេលខាងមុខនេះ លោកសង្ឃឹមថា លោកជំទាវរដ្ឋមន្រី្ត និងគណៈប្រតិភូកម្ពុជា និងអញ្ជើញទៅ​បំពេញទស្សនកិច្ចក្នុងខេត្តយូណាន ដែលល្បីល្បាញខាងប្រពៃណី និងក្រុមប្រជាជាតិដែល​មាន​វប្បធម៌សំបូរបែប។ លោក ក៏មានគោលបំណងរៀបចំកម្មវិធីអបអរសាទរ​ខួបអនុស្សាវរីយ៍​លើកទី៦៥ឆ្នាំ នៃទំនាក់ទំនងការទូតចិន-កម្ពុជា លើកនេះ ដើម្បីពន្លឿន និងជំរុញកិច្ច​សហប្រតិបតិ្តការ​រវាង​ខេត្តយូណាន ហើយនិងប្រទេសកម្ពុជា ឲ្យកាន់តែស៊ីជម្រៅ។

ជាការឆ្លើយតបលោកជំទាវ បណ្ឌិតសភាចារ្យ ភឿង សកុណា សូមអរគុណចំពោះការរៀបរាប់​របស់​លោក Zhai Yulong ហើយក៏ជាលទ្ធផលថ្មីមួយបន្ថែមទៀត ក្នុងការពង្រឹងកិច្ចសហប្រតិបតិ្តការ និងមិត្តភាព កម្ពុជា ដែលមានរយៈពេល៦៥ឆ្នាំមកហើយ ​បើនិយាយទៅមានអាយុកាលចាស់ និងមានភាពរឹងម៉ាំ។ ហើយកម្ពុជា-ចិន មានទំនាក់ទំនងផ្នែកប្រវតិ្តសាស្រ្តរាប់ពាន់ឆ្នាំ ជាក់ស្តែង​ក្នុងប្រវតិ្តសាស្រ្ត ​បានបង្ហាញពីទំនាក់ទំនងយ៉ាងស្អិតរមួត តាំងពីសម័យមុនអង្គរ ​សម័យអង្គរ និងសម័យ​ក្រោយអង្គរមកម្លេះ ​អាចនិយាយបានថាជាបងប្អូនទៅហើយ។ដូច្នេះគឺជាមិត្តភាព​ដែកថែប។

ចុងក្រោយលោកជំទាវ រដ្ឋមន្រី្ត បានបញ្ជាក់ថា តាមរយៈការដឹកនាំរបស់រាជរដ្ឋាភិបាលកម្ពុជា ក្នុង​ដំណាក់កាលដែលសម្តេចអគ្គមហាសេនាបតីតេជោ ហ៊ុន សែន នៅធ្វើជានាយករដ្ឋមន្រី្ត នៃព្រះរាជាណា​ចក្រកម្ពុជា បានពង្រឹងទំនាក់ទំនងដ៏ល្អប្រសើររវាងប្រទេសទាំងពីរ។ ជាមួយគ្នានោះលោកជំទាវបណ្ឌិតសភាចារ្យ ភឿង ​សកុណា ក៏បានសំណូមពរភាគីចិន យើង​និងរក្សាទំនាក់ទំនងដ៏ល្អនេះ ​ដែលជាដានដ៏ល្អប្រសើរពីថ្នាក់ដឹកនាំជំនាន់មុន រហូតដល់អ្នកបន្តវេន​ជំនាន់ក្រោយទៀតផងដែរ៕អត្ថបទ រដ្ឋា