ភ្នំពេញ ៖ នៅថ្ងៃទី២៦ ខែតុលានេះ ឯកឧត្តម អ៊ុក សុជាតិ រដ្ឋលេខាធិការក្រសួងវប្បធម៌ និងវិចិត្រសិល្បៈ បានអញ្ជើញសិក្ខាសាលាពិគ្រោះយោបល់ស្តីពីសិល្បៈគំនូរបុរាណ។ ថ្លែងបើកសិក្ខាសាលានេះ ឯកឧត្តម អ៊ុក សុជាតិ ថ្លែងថា ក្រសួងវប្បធម៌ និងវិចិត្រសិល្បៈ និងសហការជាមួយក្រសួងធម្មការ និងសាសនា ត្រួតពិនិត្យបច្ចេកទេស និងខ្លឹមសារលើការការគូរ គំនូរបុរាណនៅតាមព្រះវិហារវត្តអារាមឡើងវិញ។
ឯកឧត្តម អ៊ុក សុជាតិ បានថ្លែងថា ក្រសួងវប្បធម៌ និងវិចិត្រសិល្បៈ និងសហការជាមួយក្រសួងធម្មការនិងសាសនា ធ្វើការអភិរក្សវិស័យគំនូរបុរាណនៅតាមព្រះវិហារតាមទីវត្តអារាម ឡើងវិញ ដើម្បីគំនូរបុរាណ ជាពិសេសគំនូរព្រះដែលគូរនៅតាមទីវត្តអារាម គឺមានអត្ថន័យត្រឹមត្រូវតាមពុទ្ធប្រវត្តិព្រះ។
ឯកឧត្តម អ៊ុក សុជាតិ បន្តថា តាមសិក្សាស្រាវជ្រាវ អំពីប្រវត្តិសិល្បៈ នៅតាមប្រាសាទ និងតាមវត្តអារាមចំណាស់នានា បានបញ្ជាក់អោយយើងដឹងពីការអភិវឌ្ឍន៍ នៃទម្រង់សិល្បៈទៅតាមសម័យកាលនីមួយៗនិងផ្លាស់ប្ដូររចនាសិល្បៈ ពីសតវត្សមួយទៅសតវត្សមួយទៀតប្រកបដោយទេពកោសល្យ និងបញ្ញាញាណរបស់បុព្វបុរសខ្មែរ។
ឯកឧត្តម មានប្រសាសន៍ថា ចាប់តាំងពីសម័យឧត្តុង និងអាណានិគមនិយមបារាំងមក វត្តអារាមព្រះពុទ្ធសាសនាគឺមានការរីកចំរើន ជាពិសេសក្នុងរជ្ជកាលព្រះបាទស៊ីសុវត្ថិ ហើយព្រះវិហារនានា ត្រូវបានសាងសង់ឡើង មានទម្រង់ចរឹតជាខ្មែរ ត្រូវច្រឡឹងត្រូវក្បួនត្រូវខ្នាត ល្អវិចិត្រ ប៉ុន្តែដោយមានការអភិវឌ្ឍ បានធ្វើអោយគំនូរបុរាណនៅតាមព្រះវិហារ គឺមានវិវត្ត ដែលធ្វើអោយប្រឈមនឹងការបាត់បង់ទម្រង់ដើម៕
អត្ថបទ ៖ ស៊ុម សុខជា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
