ប្រធានាធិបតីអ៊ុយក្រែន លោក វ៉ូឡូឌីមៀរ ហ្សេលេនស្គី (Volodymyr Zelenskiy) ដែលឆ្លើយតបនឹងការអំពាវនាវរបស់សមាជិកព្រឹទ្ធសភាអាមេរិក នៅសប្តាហ៍នេះ ដើម្បីប្រកាសការបោះឆ្នោត នៅឆ្នាំ២០២៤ នោះ បាននិយាយថ្មីៗនេះថា ការបោះឆ្នោតអាចប្រព្រឹត្តទៅបាន ក្នុងពេលមានសង្រ្គាម លុះត្រាណាតែប្រទេសជាដៃគូ បានចូលរួមក្នុងការចំណាយ សមាជិកសភា បានផ្ដល់ការអនុម័ត ហើយគ្រប់គ្នា បានចេញទៅបោះឆ្នោត។

ការបោះឆ្នោតបច្ចុប្បន្ន មិនអាចធ្វើឡើងបាននោះទេ ក្នុងប្រទេសអ៊ុយក្រែន ក្រោមច្បាប់អាជ្ញាសឹក ដែលត្រូវតែបន្តរៀងរាល់ ៩០ថ្ងៃម្តង ហើយនាពេលបន្ទាប់ ត្រូវផុតកំណត់នៅថ្ងៃទី១៥ ខែវិច្ឆិកានេះ បន្ទាប់ពីកាលបរិច្ឆេទប្រក្រតី ក្នុងខែតុលា សម្រាប់ការបោះឆ្នោតសភា ប៉ុន្តែនៅមុនការបោះឆ្នោតប្រធានាធិបតី ដែលតាមធម្មតា នឹងប្រព្រឹត្តទៅនៅខែមីនា ឆ្នាំ២០២៤។

សមាជិកសភាជាន់ខ្ពស់របស់សហរដ្ឋអាមេរិក បានទៅធ្វើទស្សនកិច្ចនៅទីក្រុងគីវ កាលពីថ្ងៃទី២៣ ខែសីហា ក្នុងចំណោមនោះក៏មានសមាជិកព្រឹទ្ធសភា លោក Lindsey Graham ដែលបានលើកសរសើរដល់ការតស៊ូប្រយុទ្ធរបស់ទីក្រុងគីវ ប្រឆាំងនឹងប្រធានាធិបតីរុស្ស៊ី លោក វ៉្លាឌីមៀរ ពូទីន (Vladimir Putin) ប៉ុន្តែបាននិយាយថា ប្រទេសនេះចាំបាច់ត្រូវតែបង្ហាញឲ្យឃើញនូវភាពខុសប្លែក ដោយរៀបចំការបោះឆ្នោត ក្នុងពេលមានសង្គ្រាម។

ក្នុងបទសម្ភាសតាមទូរទស្សន៍ជាមួយពិធីការិនី Natalia Moseichuk ដែលជាអ្នកអានព័ត៌មានឲ្យប៉ុស្តិ៍ទូរទស្សន៍ 1+1 លោក ហ្សេលេនស្គី (Zelenskiy) បាននិយាយថា លោកបានពិភាក្សាអំពីបញ្ហានេះជាមួយលោក Graham ដែលក្នុងនោះរួមទាំងបញ្ហានៃការផ្តល់មូលនិធិ និងតម្រូវការនៃការកែប្រែច្បាប់ផងដែរ។

បទសម្ភាសនេះ ត្រូវបានបង្ហោះនៅលើឆាណែលយូធូប (YouTube ) របស់ការិយាល័យប្រធានាធិបតីអ៊ុយក្រែន កាលពីថ្ងៃអាទិត្យ (ទី២៧ ខែសីហា)៕