មន្ត្រីរដ្ឋាភិបាលជាន់ខ្ពស់មួយរូប បាននិយាយថា ប្រទេសបង់ក្លាដែស កំពុងរៀបចំចាប់ផ្តើមការធ្វើមាតុភូមិនិវត្តន៍ដោយសុវត្ថិភាព និងស្ម័គ្រចិត្តរបស់ជនរ៉ូហ៊ីងយ៉ាទៅកាន់ស្រុកកំណើតរបស់ពួកគេនៅសហភាពមីយ៉ាន់ម៉ា នៅចុងឆ្នាំនេះ ដោយដំបូងឡើយមានប្រជាជនប្រហែល១.០០០នាក់។

រដ្ឋមន្ត្រីការបរទេសបង់ក្លាដែស លោក Masud Bin Momen បានប្រាប់អ្នកសារព័ត៌មាន កាលពីថ្ងៃអាទិត្យថា ជាផ្នែកមួយនៃវិធានការកសាងទំនុកចិត្ត គណៈប្រតិភូបង់ក្លាដែសមួយក្រុម គ្រោងនឹងទៅបំពេញទស្សនកិច្ចទៅកាន់មីយ៉ាន់ម៉ានៅខែក្រោយ ខណៈដែលក្រុមមកពីមីយ៉ាន់ម៉ា នឹងមកទីនេះក្នុងពេលឆាប់ៗនេះ ដើម្បីពិភាក្សាជាមួយក្រុមជនភៀសខ្លួន។

លោកបាននិយាយថា៖«យើងបានរៀបចំបញ្ជីឈ្មោះជនរ៉ូហ៊ីងយ៉ាជាង៣.០០០នាក់ ដែលយើងរំពឹងថា នឹងបញ្ជូនត្រឡប់ទៅសហភាពមីយ៉ាន់ម៉ាវិញចំនួន ១.000នាក់ នៅដើមខែ ឬប្រហែលខែធ្នូ។

លោក បាននិយាយថា ការកាត់បន្ថយជំនួយសម្រាប់ពួករ៉ូហ៊ីងយ៉ា ដែលចំនួនប្រជាជនរបស់ពួកគេកំពុងកើនឡើងជាមួយនឹងទារកទើបនឹងកើតប្រហែល៣០.000នាក់ជារៀងរាល់ឆ្នាំ កំពុងធ្វើឲ្យមានវិបត្តិនៅក្នុងជំរំជនភៀសខ្លួន នៅក្នុងប្រទេសបង់ក្លាដែស។