បាល់ទាត់៖ ​អ្នកចាត់ការ​ក្រុម​បិសាច​ក្រហម Manchester United លោក Ole Gunnar Solskjaer កំពុង​សម្លឹង​ជើងឯក​លើកដំបូង​ ចាប់តាំងពី​មក​ដឹកនាំ​នៅ​រដូវ​កាល ២០១៨-១៩ ខណៈ​បិសាច​ក្រហម Manchester United នឹង​ជួប​ក្រុម​អេ​ស្ប៉ា​ញ Villarreal រាត្រី​នេះ​វគ្គ​ផ្តាច់ព្រ័ត្រ UEFA Europa League​។

​​Solskjaer ដែល​ធ្លាប់មាន​ប្រវត្តិ​ឈ្នះ​ជើងឯក UEFA Champions League ជាមួយ Manchester United ក្នុងនាម​ជា​កីឡាករ​នោះ មិនទាន់​ដឹកនាំ​ក្រុម​ឈ្នះ​ពាន​ណាមួយ​ឡើយ​ តាំងពី​ចូល​ដឹក​នាំ​ដំបូង​នៅ​ឆ្នាំ២០១៨ បន្ត​ពី Jose Mourinho​។​ ​​ជំនួប​នៅ​ទីក្រុង Gdansk ប្រទេស​ប៉ូឡូញ​រាត្រី​នេះ​ អ្នកចាត់ការ​សញ្ជាតិ​ណ័​រវេ​យ​រូបនេះ​បានបង្ហាញ​ពី​ជំនឿ​ចិត្ត​របស់ខ្លួន ​ក្នុងការ​យកឈ្នះ​ក្រុម​អេ​ស្ប៉ា​ញ Villarreal ដែល​បញ្ចប់​រដូវ​កាល​នៅ La Liga លេខ៧​។ ​​ស្ថានភាព​កីឡាករ​នៅ​ពេលនេះ Manchester United មិនទាន់​ច្បាស់​ថា ​ខ្សែការពារ​កណ្តាល Harry Maguire អាច ចូល​លេង​បាន​ រឺក៏​អត់​នៅឡើយ​ទេ​ បន្ទាប់ពី​មាន​របួស​កជើង​កាលពី ២សប្តាហ៍​មុន​។ ​​ក្រៅពី Harry Maguire, Manchester United នឹង​មិនមាន​វត្តមាន Anthony Martial និង​ខ្សែការពារ Phil Jones ឡើយ​នៅលើ​ទីលាន​ដោយសារ​របួស​ជង្គង់​ដូចគ្នា​។ ​​មកដល់ពេលនេះ​ដែរ​លោក Solskjaer មិនទាន់​ប្រាកដថា​ អ្នកចាំទី​ទាំងពីរ David de Gea រឺ Dean Henderson ជា​ជំរើស​ដំបូង​នៅឡើយ​ ដែលជា​ការលំបាក​ក្នុងការ​សំរេចចិត្ត​ សំរាប់​អ្នកចាត់ការ​សញ្ជាតិ​ណ័​រវេ​យ​រូបនេះ​។

​​ងាក​មក​ក្រុម​អេ​ស្ប៉ា​ញ Villarreal វិញ​នេះ​ជាការ​បង្ហាញខ្លួន​លើកដំបូង​នៅ​ក្របខណ្ឌ​អឺរ៉ុប តែ​សំរាប់​អ្នកចាត់ការ​បច្ចុប្បន្ន​លោក Unai Emery មិនមែនជា​បទពិសោធ​ថ្មី​ឡើយ​ ពោលគឺ​អតីត​អ្នកចាត់ការ Arsenal រូបនេះ​ធ្លាប់​ដឹកនាំ Sevilla ឈ្នះ​ពាន Europa League នេះ ៣រដូវ​កាល​ជាប់​គ្នា​។ ​​Villarreal ក៏​កំពុង​សម្លឹង​​ជើងឯក​អឺរ៉ុប​លើកដំបូង​ដែរ ​ក្នុង​ប្រវត្តិសាស្ត្រ​ក្លិប ៩៨ឆ្នាំ​។ ​​Villarreal ដែល​ឡើង​មកដល់​វគ្គ​នេះ​ដោយ​ទំលាក់ Arsenal នៅ​វគ្គ​ពាក់កណ្តាល​ផ្តាច់ព្រ័ត្រ​នោះ មិនទាន់​ចាញ់​មួយ​ប្រកួត​ណា​ឡើយ​នៅ Europa League រដូវ​កាល​នេះ​ដោយ​រួមមាន​ឈ្នះ ១២ ស្មើ ២​។ ​​ជំនួប​នៅ​ទឹកដី​ប៉ូឡូញ​យប់​នេះ​គឺជា​ជំនួប​ទី៥ របស់​ក្រុម​ទាំងពីរ បន្ទាប់ពី​ជំនួប​ ៤​លើក​កន្លងមក​នៅ Champions League រដូវ​កាល ២០០៥-០៦ និង ២០១០-១១ សុទ្ធតែ​បញ្ចប់​ដោយ​លទ្ធផល​ស្មើគ្នា ០-០៕

​អត្ថបទ​៖​នាង សុភា​វុ​ធ