សហព័ន្ធកីឡាបាល់ទាត់កម្ពុជា(FFC) បានបង្ហាញបញ្ជីឈ្មោះកីឡាករក្រុមជម្រើសជាតិអាយុក្រោម ២៣​ឆ្នាំ​កម្ពុជា ដើម្បីប្រមូលផ្ដុំហ្វឹកហាត់ត្រៀមការប្រកួតវគ្គជម្រុះពានរង្វាន់ AFC U23 Asian Cup Qatar 2024 ពូលJ នៅប្រទេសអារ៉ាប៊ីសាអូឌីតហើយ ដោយការប្រកួតនឹងធ្វើឡើងចាប់ពីថ្ងៃទី០៦ ដល់ថ្ងៃទី១២ ខែ​កញ្ញា ឆ្នាំ២០២៣ ខាងមុខ ។

ប៉ុន្ដែបេសកកម្មរបស់ក្រុមគោព្រៃជំទង់កម្ពុជាលើកនេះ នឹងដឹកនាំដោយគ្រូបង្វឹកជនជាតិជប៉ុនលោក Koji Gyotoku ជំនួសលោក Felix Dalmas ដែលជាប់ភារកិច្ចដឹកនាំក្រុមជម្រើសជាតិកម្ពុជា ត្រៀម​ការ​ប្រកួត​មិត្ត​ភាព​អន្ដរជាតិ ២ប្រកួត ជាមួយក្រុមភ្ញៀវហុងកុង នាថ្ងៃទី០៧ ខែកញ្ញា និងជួបក្រុមភ្ញៀវម៉ាកាវ នាថ្ងៃ​ទី​១១ ខែកញ្ញាខាងមុខ ។

អ្វីដែលគួរឲ្យកត់សម្គាល់ទៀតនោះ គឺសមាសភាពកីឡាករ ដែល​ត្រៀម​ប្រកួត​ជម្រុះ​ជើង​ឯក​យុវជន​អាស៊ី​នា​ពេល​ខាងមុខ មានការផ្លាស់ប្ដូរស្ទើរពាក់កណ្ដាលក្រុម នៃកីឡាករ ដែលបាន​ចូលរួម​ប្រកួត​ជើង​ឯក​យុវជន​អាស៊ាន AFF U23 Champinship 2023 នៅប្រទេសថៃ កាលពីថ្មីៗ ។

យោងតាមបញ្ជីឈ្មោះកីឡាករ ២៣រូប ដែលបានបង្ហាញនៅថ្ងៃទី២៨ ខែសីហា រួមមាន​សមាជិក​ក្រុម​ព្រះខ័ន​រាជ​ស្វាយរៀង ៣នាក់, ណាហ្គាវើលដ៏ ៤នាក់, អង្គរថាយហ្គឺរ ៣នាក់, វិសាខា ៥នាក់, បឹងកេត ២នាក់, ព្រៃវែង ២នាក់, ភ្នំពេញក្រោនម្នាក់, គិរីវង់សុខសែនជ័យម្នាក់, ISI ដង្កោសែនជ័យម្នាក់ និង​សាលា​បាល់ទាត់ជាតិបាទីម្នាក់ ។

សម្រាប់បេសកកម្ម នៃការប្រកួតជម្រុះ AFC U-23 Asian Cup 2024 ក្រុមជម្រើសជាតិ U23 កម្ពុជា គឺ​ស្ថិតក្នុងពូលJ ជាមួយក្រុមម្ចាស់ផ្ទះអារ៉ាប់ប៊ីសាអូឌីត, លីបង់ និងក្រុមជម្រើសជាតិ U23 ម៉ុងហ្គោលី ។ ចំពោះកម្មវិធីប្រកួត ក្រុមគោព្រៃជំទង់កម្ពុជា នឹងត្រូវលីបង់មុនគេ នាថ្ងៃទី០៦ ខែកញ្ញា មុន​បន្ដ​ជួប​ក្រុម U23 ម៉ុងហ្គោលី នាថ្ងៃទី០៩ ខែកញ្ញា និងចុងក្រោយ ជួបក្រុមម្ចាស់ផ្ទះអារ៉ាប់ប៊ីសាអូឌីត នាថ្ងៃទី១២ ខែ​កញ្ញា ឆ្នាំ២០២៣ ខាងមុខ ។

គួរដឹងថា ការប្រកួតវគ្គជម្រុះ នៃព្រឹត្តិការណ៍បាល់ទាត់យុវជនប្រចាំទ្វីបអាស៊ីនេះ គឺមាន ៤៣ក្រុមចូលរួម និង​បែងចេញជា ១១ពូល ដើម្បីធ្វើការប្រកួតជម្រុះ ចាប់ពីថ្ងៃទី០៤-១២ ខែកញ្ញា ឆ្នាំ២០២៣ ហើយ​ចម្រាញ់​រក​ក្រុមកំពូលតារាង នៃពូលនីមួយៗ ព្រមទាំងក្រុមលេខ២ ល្អជាងគេ ៤ក្រុម ឡើងទៅជុំ​ផ្ដាច់​ព្រ័ត្រ ជាមួយក្រុមម្ចាស់ផ្ទះកាតា ដែលគ្រោងធ្វើការប្រកួតវគ្គ ១៦ក្រុមចុងក្រោយ ចាប់ពីថ្ងៃទី១៥ ខែ​មេសា ដល់ថ្ងៃទី០៣ ខែឧសភា ឆ្នាំ២០២៤ ខាងមុខ ៕ អត្ថបទ លី ឈុនឡា