ភ្នំពេញ៖សាកលវិទ្យាល័យខេមតិច សហគ្រិនខ្មែរ និងគណៈកម្មាធិកាសេដ្ឋកិច្ចនិងសង្គម របស់អង្គការសហប្រជាជាតិសម្រាប់អាស៊ីប៉ាស៊ីហ្វិក (UN-ESCAP) បានសហការគ្នារៀបចំកម្មវិធីប្រកួតប្រជែងវានុវត្តន៍បច្ចេកវិទ្យា (Innovative Tech Challenge) 

ដើម្បីចូលរួមចំណែកលើកស្ទួយធុរកិច្ចថ្មីការវិនិយោគក្នុងស្រុក និងការអភិវឌ្ឍសហគ្រាសធុនតូចនិងមធ្យម ជាពិសេសក្រុមហ៊ុនដែលធ្វើពាណិជ្ជកម្មទាក់ទងនឹងវិស័យតិចណូឡូជី។ 

 ឯកឧត្តមបណ្ឌិត ឈៀង វណ្ណមុនិណ្ឌ នៅក្នុងកម្មវិធីកាលពីសប្តាហ៍កន្លងទៅនេះ បានមានប្រសាសន៍ថា កម្មវិធីប្រកួតប្រជែងនវានុវត្តន៍បច្ចេកវិទ្យា មានគោលដៅលើកកម្ពស់ចំណេះដឹងផ្នែកបច្ចេកវិទ្យា និងវិទ្យាសាស្ត្រ, កសាងសមត្ថភាពសហគ្រិនភាពក្នុង ចំណោមនិស្សិតកម្រិតសាកលវិទ្យាល័យដែលអនាគត ក្លាយជាស្ថាបនិកវ័យក្មេងដែលមានគំនិតច្នៃប្រឌិត និងជំរុញឱ្យមានការប្រើប្រាស់បច្ចេកវិទ្យាក្នុងការចូលរួមជួយដោះស្រាយបញ្ហាសង្គម។ ឯកឧត្តម បានបន្តថា សហគ្រិនខ្មែរ នឹងបន្តគាំទ្រ និងពង្រីកវិសាលភាពនៃកម្មវិធីប្រកួតប្រជែងនវានុវត្តន៍ និងសហគ្រិនភាពដល់សិស្សានុសិស្សសាកលវិទ្យាល័យ ព្រមទាំងបន្តសហការជាមួយគ្រឹះស្ថានអប់រំ វិស័យឯកជន និងដៃគូអភិវឌ្ឍនានា។  

លោកបណ្ឌិត ឃៀង សុធី សាកលវិទ្យាធិការ នៃសាកលវិទ្យាល័យខេមតិច បានបញ្ជាក់ដែរថា ខេមតិចបានខិតខំពង្រឹង និងពង្រីកកិច្ចសហប្រតិបត្តិការល្អជាមួយស្ថាប័នរដ្ឋ ក្រុមហ៊ុនឯកជន ដៃគូអភិវឌ្ឍន៍ និងសាកលវិទ្យាល័យ ទាំងក្នុងស្រុក និងនៅបរទេស ដើម្បីជំរុញឲ្យមានការបង្កើតគំនិតថ្មី និងនវានុវត្តន៍សម្រាប់ដោះស្រាយបញ្ហាប្រឈមរបស់សង្គម និង ឧស្សាហកម្ម ក្នុងគោលបំណងជំរុញអោយមានការអភិវឌ្ឍន៍ប្រកបដោយចិរភាពនៅកម្ពុជា។ លោកបន្តថា កម្មវិធីថ្ងៃនេះ គឺជាសក្ខីភាពមួយទៀតដែលបញ្ជាក់ថា ខេមតិច បានត្រៀមខ្លួនគ្រប់ពេលវេលាដើម្បីចូលរួមចំណែកជាមួយរាជរដ្ឋាភិបាលកម្ពុជាក្នុងការអនុវត្តគោលនយោបាយអាទិភាព ក៏ដូចជាចក្ខុវិស័យរបស់រដ្ឋលើការអភិវឌ្ឍប្រព័ន្ធអេកូឡូស៊ីដែលបង្កើតអោយមានបរិយាកាសអំណោយផលដល់យុទ្ធសាស្រ្តសេដ្ឋកិច្ច និងសង្គមឌីជីថល។

កម្មវិធីប្រកួតប្រជែងបច្ចេកវិទ្យានវានុវត្តន៍ ជាកម្មវិធីមួយក្នុងចំណោមសកម្មភាពជាច្រើនរបស់សាកលវិទ្យាល័យខេមតិច ក្នុងការជំរុញការស្រាវជ្រាវនវានុវត្តន៍ និងការបណ្តុះគំនិតសហគ្រិនភាពក្នុងចំណោមនិស្សិតសាកលវិទ្យាល័យ ក្នុងគោលបំណងចម្បង ដើម្បីភ្ញាស់គំនិតធុរកិច្ចថ្មី ព្រមទាំងផ្តល់ជាថវិកាសម្រាប់គាំទ្រដល់ការបង្កើតអាជីវកម្ម, ផ្តល់វគ្គបណ្តុះបណ្តាលការបង្កើតធុរកិច្ចថ្មីដល់និសិ្សតនៅតាមសាកលវិទ្យាល័យនានាក្នុងប្រទេស និងចូលរួមជាមួយសហគ្រិនខ្មែរ និងរាជរដ្ឋាភិបាល ក្នុងការធ្វើអោយប្រសើរឡើងនូវប្រព័ន្ធអេកូឡូស៊ីធុរកិច្ចថ្មីនៅកម្ពុជា។

សូមបញ្ជាក់ថាកម្មវិធីខាងលើនេះ បានស្វែងរកឃើញម្ចាស់ជ័យលាភីចំនួន ៣ក្រុម មានដូចជា៖ ជ័យលាភីទី១.ក្រុម Tam Dan ទទួលបានថវិកាចំនួន ៣ ៥០០ដុល្លារសហរដ្ឋអាមេរិក។ Tam Dan គឺជាកម្មវិធីទួរសព្ទដៃដែលបានដាក់បញ្ចូលបច្ចេកវិទ្យាបញ្ញាសិប្បនិមិត្តអាចអនុញ្ញាតអោយមាតាបិតា និងអាណាព្យាបាលតាមដានពីសកម្មភាពនៃការសិក្សា និងលទ្ធផលរបស់សិស្សានុសិស្ស។ ជ័យលាភីទី២.ក្រុម VOLTS ទទួលបានថរិកាចំនួន ២ ៥០០ដុល្លារសហរដ្ឋអាមេរិក។ VOLS គឺជាការបង្កើតឧបករណ៍ថ្មីមួយ អាចអោយម្ចាស់រោងចក្រ សហគ្រាសតាមដានសត្ថិនៃការប្រើប្រាស់អគ្គីសនី។ និងជ័យលាភីទី៣. គឺក្រុម Uniflow ទទួលបានថវិកាចំនួន ២ ០០០ដុល្លារសហរដ្ឋអាមេរិក។ Uniflow គឺជាកម្មវិធីគ្រប់គ្រង និងវិភាគកម្រិតខ្ពស់ដោយប្រើបច្ចេកវិទ្យាបញ្ញាសិប្បនិម្មិត និង Machine Learning ដែលអាចជួយអោយការងារគ្រប់គ្រងរបស់អ្នកគ្រប់គ្រងហាង រឺម្ចាស់ហាង ដំណើរការបានល្អ ចំពោះការខិតខំប្រឹងប្រែងក្នុងការបង្កើតគំនិតធុរកិច្ចថ្មីនេះ ដែលទទួលបានថវិកាគាំទ្រផ្ទាល់ពីសហគ្រិនខ្មែរ៕ ដោយ ៖ បូរ៉ាវី