ជប៉ុន ៖ ប្រទេសជប៉ុន នៅថ្ងៃអង្គារនេះបានគំរាមនាំប្រទេសចិន ទៅកាន់អង្គការពាណិជ្ជកម្មពិភពលោក(WTO) ដើម្បីស្វែងរកការកែប្រែចំពោះបម្រាមរបស់ទីក្រុងប៉េកាំងលើការនាំចូលអាហារសមុទ្ររបស់ជប៉ុន បន្ទាប់ពីការបញ្ចេញទឹកមានសារធាតុវិទ្យុសកម្មធ្វើប្រព្រឹត្តិកម្មរួចពីរោងចក្រថាមពលនុយក្លេអ៊ែរ Fukushima Daiichi ដែលមិនដំណើរការ។ រដ្ឋមន្ត្រីការបរទេសជប៉ុន លោក Yoshimasa Hayashi បានប្រាប់អ្នកសារព័ត៌មានថាប្រទេសជប៉ុន នឹងចាត់វិធានការចាំបាច់លើបម្រាមផលិតផលជលផលរបស់ប្រទេសចិន ក្រោមមធ្យោបាយផ្សេងៗរួមមានទាំងក្របខណ្ឌអង្គការពាណិជ្ជកម្មពិភពលោក (WTO)។

រដ្ឋមន្ត្រីសន្តិសុខសេដ្ឋកិច្ច លោក Sanae Takaichi បាននិយាយដាច់ដោយឡែកថា ការដាក់បណ្តឹងនៅអង្គការពាណិជ្ជកម្មពិភពលោក អាចក្លាយជាជម្រើសមួយប្រសិនបើការតវ៉ាចំពោះប្រទេសចិន តាមរយៈផ្លូវការទូតពុំមានប្រសិទ្ធភាព។ ការលើកឡើងដូច្នេះ កើតមានឡើងខណៈទីតាំងពាណិជ្ជកម្ម និងសធារណៈច្រើនកន្លែងនៅបន្តទទួលការហៅទូរស័ព្ទបង្កការរំខានពីទូរស័ព្ទមួយចំនួនដែលមានលេខកូដប្រទេសចិន+៨៦ ដោយមានអ្នកហៅទូរស័ព្ទរាយការណ៍ត្អូញត្អែរអំពីការបញ្ចេញទឹកពីរោងចក្រ Fukushima។ 

សារព័ត៌មាន JIJI បានរាយការណ៍ថា ទីភ្នាក់ងារគោលនយោបាយជាតិប្រទេសជប៉ុន បានទទួលរបាយការណ៍ ២២៥ នៃការហៅទូរស័ព្ទរំខានរហូតដល់ពេលបច្ចុប្បន្ននេះ ហើយរដ្ឋាភិបាល បាននិយាយថាខ្លួនកំពុងស្វែងរកជំនួយពីក្រុមហ៊ុនទូរគមនាគមន៍ដើម្បីបិទការហៅទូរស័ព្ទ។