អាមេរិក ៖ ប្រធានាធិបតីអាមេរិកលោក ចូ បៃដិន (Joe Biden) នឹងធ្វើដំណើរទៅបំពេញទស្សនកិច្ចនៅប្រទេសវៀតណាម នាខែក្រោយ ដើម្បីជួបជាមួយមន្ត្រីជាន់ខ្ពស់របស់ប្រទេសនេះពិភាក្សាអំពីបញ្ហានានា ដោយរាប់ចាប់ពីបច្ចេកវិទ្យា និងសេដ្ឋកិច្ច រហូតដល់ស្ថិរភាព ក្នុងតំបន់ ព្រមទាំងបម្រែបម្រួលអាកាសធាតុ ខណៈដែលក្រុងវ៉ាស៊ីនតោន សម្លឹងដល់ទំនាក់ទំនងកាន់តែជិតស្និទ្ធ ក្នុងតំបន់ ដែលប្រទេសចិន មានឥទ្ធិពលកាន់តែខ្លាំងឡើង។

សេតវិមាន បានឲ្យដឹងថា អំឡុងទស្សនកិច្ចនោះ លោក បៃដិន នឹងជួបជាមួយអគ្គលេខាបក្សកុម្មុយនីស្ត លោក Nguyen Phu Trong (ង្វៀន ភូ ទ្រុង) និងមេដឹកនាំកំពូលវៀតណាមផ្សេងទៀត នៅទីក្រុងហាណូយ នាថ្ងៃទី១០ ខែកញ្ញា មុនពេលធ្វើដំណើរទៅកាន់រដ្ឋ Alaska ដើម្បីធ្វើពិធីរំលឹកខួបនៃការវាយប្រហារមកលើសហរដ្ឋអាមេរិក កាលពីថ្ងៃទី១១ ខែកញ្ញា ឆ្នាំ២០០១។

ទីក្រុងវ៉ាស៊ីនតោន មានបំណងចង់ធ្វើឲ្យទំនាក់ទំនងជាមួយទីក្រុងហាណូយកាន់តែប្រសើរឡើង ដោយចាត់ទុកថា ប្រទេសនេះ គឺជាដៃគូដ៏សំខាន់ក្នុងតំបន់ នៅពេលដែលទំនាក់ទំនងរបស់អាមេរិកជាមួយទីក្រុងប៉េកាំងកាន់តែតានតឹងឡើង។ ទន្ទឹមនឹងនោះដែរ វៀតណាមត្រូវតែថ្លឹងថ្លែងនូវប្រតិកម្មរបស់អ្នកជិតខាងដ៏មានឥទ្ធិពលរបស់ខ្លួន ខណៈដែលចិនកាន់តែរុលទៅមុខដោយមិនរអា។

ក្រុងវ៉ាស៊ីនតោន ផ្តោតសំខាន់លើប្រទេសវៀតណាម ដោយចាត់ទុកថា ជាដៃគូក្នុងតំបន់ដ៏សំខាន់ ជាពិសេស នៅពេលដែលការចងចាំនៃសម័យសង្គ្រាមវៀតណាម កាន់តែរសាត់បាត់បន្តិចម្ដងៗ។ កាលពីខែមីនា លោក បៃដិន និងលោក Trong បានជជែកពិភាក្សាគ្នាតាមទូរស័ព្ទ ខណៈដែលបន្ទាប់មករដ្ឋមន្ត្រីការបរទេសអាមេរិក លោក Antony Blinken បានទៅទស្សនកិច្ចប្រទេសអាស៊ីអាគ្នេយ៍មួយនេះ នៅមួយខែក្រោយ៕