​អាមេរិក៖ ការ​ប្រមូល​ផ្ដុំ​គ្នា​មួយ​រំឭក​ដល់​ការ​ស្លាប់​របស់​បុរស​ស្បែក​ខ្មៅ George Floyd បាន​ធ្វើឡើង​នៅ​ក្នុង​ទីក្រុង New York កាលពី​ថ្ងៃ​អង្គារដើម្បី​រំឭក​ដល់ពេល​វេលា​ ១​ឆ្នាំ​ចាប់​តាំង​ពី​ការ​ស្លាប់​របស់​គេ​។​

​ក្រុម​អ្នក​តវ៉ា​រាប់​រយ​នាក់​បាន​ស្រែក​ស្រុះ​ៗ​គ្នា និង​កាន់​ផ្ទាំង​បដា​ថ្កោលទោស​ភាព​សាហាវ​ព្រៃផ្សៃ​របស់​នគរ​បាល ខណៈ​ពួកគេ​បាន​ស្ដាប់​សុន្ទរកថា ដែល​ទាមទារ​ឲ្យ​ធ្វើ​កំណែ​ទម្រង់​នគរបាល និង​ទំនួល​ខុសត្រូវ​នៅ​ទូទាំង​សហរដ្ឋអាមេរិក​។ កាលពី​ថ្ងៃ​ទី​២៥​ ខែ​ឧសភា​ ឆ្នាំ​២០២០ នៅ​ក្នុង​ទីក្រុង​មី​នី​អែប​ប៉ូលីស​ អតីតមន្ត្រី​នគរបាល​ស្បែក​ស លោក ដេ​រីក ឆូ​វីន បាន​យក​ជង្គង់​សង្កត់​លើ​ក​របស់ Floyd រយៈពេល​ ៩​នាទី​ និង ​២៩​វិនាទី ទាំង​ដែល​បុរស​ស្បែ​ខ្មៅ​រូប​នោះ​បាន​ស្រែក​ឲ្យ​គេ​ជួយ និង​ដកដង្ហើម​មិន​រួច​។​ ចំណែក​នៅ​ទីក្រុង Los Angeles ឯណោះ​វិញ មនុស្ស​ជាច្រើន​បាន​ប្រមូល​ផ្ដុំ​គ្នា​នៅ​តាម​ដង​ផ្លូវ​មួយ ​កាលពី​ព្រឹក​ថ្ងៃ​អង្គារ​ដើម្បី​រំឭក​ដល់​វិញ្ញាណក្ខន្ធ​របស់​លោក George Floyd ក៏ដូចជា​ប្រមូលផ្ដុំ​ទាម​ទារក​យុត្តិធម៌ ​ចំពោះ​ការ​រើ​ង​អើ​ង​ជាតិ​សាសន៍​។​

​នៅ​ថ្ងៃ​ជាមួយគ្នា​នោះ​ដែរ ក្រុម​គ្រួសារ​របស់ George Floyd បាន​ទៅកាន់​ទីលាន Black Lives Matter Plaza ក្នុង​ទីក្រុង Washington, D.C.​ជាទី​ដែល​ពួកគេត្រូវ​បាន​សម្ភាសន៍​អំពី​យុត្តិធម៌​ចំពោះ​ការ​ស្លាប់​របស់ George Floyd ប្រព្រឹត្ត​ឡើង​ដោយ​នគរបាល។​ ការ​ធ្វើ​ដំណើរ​ទៅកាន់​ទីនោះ កើតឡើង​បន្ទាប់ពី​បាន​ជួប​ជាមួយ​លោក ប្រធានាធិបតី Joe Biden និង​អនុ​ប្រធានាធិបតី Kamala Harris និង​តំណាងរាស្ត្រ​ព្រឹទ្ធសភា​សំខាន់ៗ​នៅ​វិមាន​កា​ពី​តូ​ល៕

អត្ថបទ៖ សុខមាន