ភ្នំពេញ៖ ប្រទេសកម្ពុជា និងប្រទេសចិន អបអរសារទ ចំពោះសមិទ្ធផល នៃកិច្ចសហប្រតិបត្តិការផ្នែកមាត្រាសាស្ត្រជាមួយគ្នា នៅក្នុងសន្និសីទកិច្ចសហប្រត្តិការមេគង្គ-ឡានឆាង លើកទី៤ ហើយភាគជាដៃគូលើវិស័យមាត្រាសាស្ត្រនេះ នឹងបានចូលរួមចំណែកធ្វើឲ្យមានស្ថិភាព សន្តិភាព និងវិបុលភាព នៅក្នុងតំបន់ផងដែរ ។

ដោយសន្និសីទនេះ ក៏ធ្វើឡើងស្របពេលផងដែរនៃខួបលើកទី៦៥ នៃការបង្កើតទំនាក់ទំនងការទូតរវាងព្រះរាជាណាចក្រកម្ពុជា និងសាធារណរដ្ឋប្រជាមានិតចិន និងខួបលើកទី១០ នៃគំនិតផ្តួចផ្តើមខ្សែក្រវ៉ាត់ និងផ្លូវ ។

ក្នុងសុន្ទរកថាតាមប្រព័ន្ធអនឡាញជូនអង្គសន្និសីទ នៅថ្ងៃទី២៩ ខែសីហា ឆ្នាំ២០២៣ ឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានមានប្រសាសន៍ថា មាត្រាសាស្ត្រ ដែលជាវិទ្យាសាស្ត្រនៃការវាស់វែង មានសារៈសំខាន់ណាស់សម្រាប់សង្គមសម័យទំនើប ដោយវាគាំទ្រការធ្វើពាណិជ្ជកម្មដោយយុត្តិធម៌ លើកកម្ពស់ស្តង់ដារឧស្សាហកម្ម និងការពារសុវត្ថិភាព និងសុខភាពសាធារណៈ ដើម្បីទទួលស្គាល់នូវសារៈសំខាន់នេះ កម្ពុជា-ចិន បានបោះជំហានយ៉ាងសំខាន់ ក្នុងកិច្ចសហប្រតិបត្តិការ និងផ្លាស់ប្តូរជំនាញក្នុងវិស័យមាត្រាសាស្ត្រ ។

ឯកឧត្តម បានបន្តថា កិច្ចសហប្រតិបត្តិការនេះ មិនត្រឹមតែផ្តល់ផលប្រយោជន៍ដល់រដ្ឋាភិបាលប៉ុណ្ណោះទេ ប៉ុន្តែថែមទាំងមានឥទ្ធិពលវិជ្ជមានទៅលើឧស្សាហកម្ម ដែលនាំឱ្យមានការវាស់វែងច្បាស់លាស់ និងបង្កើនផលិតភាព និងសូមថ្លែងអំណរគុណដល់ប្រទេសចិន ចំពោះការគាំទ្រ និងមិត្តភាពដែលមិនផ្លាស់ប្តូរនេះ ហើយមានទំនុកចិត្តថា កិច្ចសហប្រតិបត្តិការផ្នែកមាត្រាសាស្ត្រនេះ នឹងបន្តរីកចម្រើន នាំមកនូវផលប្រយោជន៍ទៅវិញទៅមក សម្រាប់ប្រជាជននៃប្រទេសទាំងពីរ និងរួមចំណែកដល់សន្តិភាព ស្ថិរភាព និងវិបុលភាពក្នុងតំបន់ ។

គួរបញ្ជាក់ថា ក្នុងរយៈពេល ៦៥ឆ្នាំកន្លងមកនេះ កម្ពុជា និងចិន បានកសាងទំនាក់ទំនងការទូតដ៏រឹងមាំ និងស្វាហាប់ ក្រោមកិច្ចសហប្រតិបត្តិការក្នុងវិស័យជាច្រើន និងបានបង្កើនការយោគយល់គ្នាទៅវិញទៅមក ទំនុកចិត្ត និងមិត្តភាព ។ 

ដោយឡែកក្នុងវិស័យមាត្រាសាស្ត្រ អ្នកជំនាញចិន បានផ្តល់ជំនួយបច្ចេកទេសដ៏មានតម្លៃ និងបានផ្ទេរចំណេះដឹងជាច្រើនដល់កម្ពុជា ដែលកិច្ចសហប្រតិបត្តិការនេះ មិនត្រឹមតែធ្វើឱ្យប្រសើរឡើងនូវស្តង់ដារវាស់វែងប៉ុណ្ណោះទេ ប៉ុន្តែថែមទាំងបានរួមចំណែកដល់ការអភិវឌ្ឍនៃប្រទេសទាំងពីរផងដែរ ។ ក្នុងសន្និសីទលើកទី៤នេះ រាជរដ្ឋាភិបាលកម្ពុជា បានផ្តល់មេដាយសហមេត្រី ដល់ឥស្សរជនចិនចំនួន បីរូប ដោយទទួលស្គាល់ការរួមចំណែកដ៏ឆ្នើមរបស់ពួកគេ ចំពោះកិច្ចសហប្រតិបត្តិការផ្នែកមាត្រាសាស្ត្រ ៕ អត្ថបទ បាន សុខរិទ្ធិ