ត្បូងឃ្មុំ ៖ បុរសម្នាក់ដែលមានជំងឺកូវីដ-១៩ ហើយបែកថ្នាំនោះ ពេលនេះត្រូវបានសមត្ថកិច្ចឃាត់ខ្លួនបានហើយ ក្រោយពីបានវាយអ្នកយាមជាយោធាម្នាក់បណ្តាលឱ្យស្លាប់ នៅមន្ទីរពេទ្យបង្អែកស្រុកពញាក្រែក កាលពីល្ងាចថ្ងៃទី២៥ ខែឧសភា ឆ្នាំ២០២១នេះ ។
លោកវេជ្ជបណ្ឌិត កែវ វណ្ណៈ ប្រធាន មន្ទីរសុខាភិបាលខេត្តត្បូងឃ្មុំ បានឲ្យដឹងថា ជនសង្ស័យដែលមានវិជ្ជមានកូវីដ-១៩ ដែលមានសារធាតុញៀនក្នុងខ្លួនផងនោះ មានឈ្មោះ មឿន ម៉ឺន អាយុ ៣៨ឆ្នាំ មានទីលំនៅភូមិក្រពើសារ ឃុំដំរិល ស្រុកអូររាំងឪ ត្រូវបានឃាត់ខ្លួនក្រោយធ្វើសកម្មភាពសម្លាប់ជនរងគ្រោះ ជាយោធា ឈ្មោះ មាន វ៉ៃ អាយុ២៩ឆ្នាំ នៅភូមិហួចកើត ឃុំក្រែក ស្រុកពញាក្រែក ជាមន្ត្រីយោធាផ្នែកសឹករងស្រុកពញាក្រែក ត្រូវបានអង្គភាពបញ្ជូនទៅយាមនៅមន្ទីរពេទ្យបង្អែកស្រុកពញាក្រែក ។ ប៉ុន្តែ ជាអកុសល ជនរងគ្រោះ បានសម្លាប់ភ្លាមៗ នៅកន្លែងកើតហេតុ ខណៈ ជនសង្ស័យមានអាការៈ រត់ឆ្លេឆ្លា ក្រុមគ្រូពេទ្យដែលប្រចាំនៅមណ្ឌលនោះ បានសួរគេថា គេមានអាការៈ ពិបាកក្នុងខ្លួន( បែកថ្នាំ ) ហើយគេបានដើរសំដៅទៅកន្លែងអ្នកយាមជាមន្ត្រីយោធារួច បានវាយប្រតប់ឈានដល់ការវាយនឹងដំបង និងចបកាប់វាយចំសៀតផ្កា របស់ជនរងគ្រោះកំពុងអង្គុយយាមម្នាក់ឯងរហូតស្លាប់។
ក្រោយកើតហេតុ ជនសង្ស័យ ត្រូវបានបញ្ជូនទៅដាក់ក្នុងបន្ទប់ព្យាបាលអ្នកទោស ក្នុងមន្ទីរពេទ្យ និងរងចាំព្យាបាលជំងឺកូវីដ-១៩ ទើបសមត្ថកិច្ចចាត់ការតាមនីតិវិធីច្បាប់ ។ ដោយឡែក សាកសពជនរងគ្រោះ ត្រូវបានយកទៅបូជានៅវត្តសមាធិ ក្នុងស្រុកពញាក្រែក ៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
