អ៊ីរ៉ង់ ៖ ប្រធានាធិបតីអ៊ីរ៉ង់ លោក Ebrahim Raisi បាននិយាយថា សមាជិកភាពរបស់អ៊ីរ៉ង់ នៅក្នុងប្លុក BRICS និងអង្គការសហប្រតិបត្តិការសៀងហៃ (SCO) អាចជួយឲ្យខ្លួនទប់ទល់នឹងឯកតោភាគីនិយមរបស់សហរដ្ឋអាមេរិកបាន។

លោក Raisi បានធ្វើការកត់សម្គាល់បែបនេះក្នុងសន្និសីទសារព័ត៌មាន នៅរដ្ឋធានីតេអេរ៉ង់របស់ប្រទេសអ៊ីរ៉ង់ ខណៈពេលកំពុងលើកឡើងអំពីឥទ្ធិពលសេដ្ឋកិច្ចនៃសមាជិកភាពរបស់អ៊ីរ៉ង់ នៅក្នុងប្លុកទាំង២ នេះ ដោយលោកបានប្រាប់ថា អ៊ីរ៉ង់ ជាមួយនឹងសមត្ថភាពពិសេសរបស់ខ្លួន ប្រាកដជាអាចក្លាយជាសមាជិកដ៏មានឥទ្ធិពលរបស់ប្លុកទាំង២។

គួរបញ្ជាក់ដែរថា កាលពីដើមសប្តាហ៍នេះ ប្រទេសអ៊ីរ៉ង់ រួមជាមួយអាហ្សង់ទីន អេហ្ស៊ីប អេត្យូពី អារ៉ាប៊ីសាអ៊ូឌីត និងអារ៉ាប់រួម ត្រូវបានអញ្ជើញជាផ្លូវការឲ្យចូលរួមជាមួយប្លុក BRICS ជាក្រុមនៃប្រទេសមានសេដ្ឋកិច្ចកំពុងរីកចម្រើន ដែលបច្ចុប្បន្ន មានប្រទេសប្រេស៊ីល រុស្ស៊ី ឥណ្ឌា ចិន និងអាហ្វ្រិកខាងត្បូងជាសមាជិក។

ពាក់ព័ន្ធនឹង SCO ជាអង្គការក្នុងតំបន់ ដែលរួមចំណែកជាពិសេសដល់កិច្ចសហប្រតិបត្តិការ ក្នុងវិស័យសេដ្ឋកិច្ច សង្គម និងសន្តិសុខ លោក Raisi បាននិយាយថា អ៊ីរ៉ង់ផ្ដល់តម្លៃយ៉ាងខ្ពស់ ដោយការធ្វើឲ្យទំនាក់ទំនងកាន់តែស៊ីជម្រៅជាមួយអង្គការនេះ។ ប្រទេសអ៊ីរ៉ង់ បានក្លាយជាសមាជិកពេញសិទ្ធិរបស់អង្គការ SCO កាលពីដើមខែកក្កដា នៅឯកិច្ចប្រជុំលើកទី២៣ នៃក្រុមប្រឹក្សាប្រមុខរដ្ឋរបស់អង្គការនេះ។

អំឡុងសន្និសីទនោះ ដោយច្រានចោលនូវការលើកឡើង ដែលថា មានតែសម្របសម្រួលជាមួយលោកខាងលិចប៉ុណ្ណោះ ដែលអាចជួយឲ្យអ៊ីរ៉ង់ទម្លាយនូវភាពទាល់ច្រកផ្នែកសេដ្ឋកិច្ចបាន លោក Raisi បាននិយាយថា៖ «ខ្ញុំបាននិយាយដដែលៗថា យើងនឹងមិនរង់ចាំការញាក់ចិញ្ចើមពីពួកគេ (ប្រទេសលោកខាងលិច) ហើយយើងក៏មិនចងភ្ជាប់សេដ្ឋកិច្ចរបស់ប្រទេស និងជីវិតរបស់ប្រជាជនទៅនឹងឆន្ទៈរបស់ពួកគេនោះឡើយ»៕