ប្រទេសឥណ្ឌា បានឲ្យដឹងថា ខ្លួនបានធ្វើការតវ៉ាផ្លូវការយ៉ាងខ្លាំងក្លាជាមួយប្រទេសចិន ពាក់ព័ន្ធនឹងផែនទីថ្មី ដែលអះអាងសិទ្ធិលើទឹកដីរបស់ខ្លួន។ 

ការតវ៉ានេះ បានកើតមានឡើង បន្ទាប់ពីប្រព័ន្ធផ្សព្វផ្សាយឥណ្ឌា បានរាយការណ៍ថា ផែនទីថ្មីនោះ បង្ហាញឲ្យឃើញថា រដ្ឋភាគឦសាន Arunachal Pradesh និងតំបន់ខ្ពង់រាប Aksai Chin ដែលមានជម្លោះ ជាទឹកដីរបស់ប្រទេសចិន។ ផែនទីនោះត្រូវបានចេញផ្សាយដោយក្រសួងធនធានធម្មជាតិរបស់ប្រទេសចិន កាលពីថ្ងៃចន្ទ (ទី២៨ ខែសីហា)។

អ្នកនាំពាក្យក្រសួងការបរទេសឥណ្ឌា លោក Arindam Bagchi បាននិយាយថា៖ «យើងបដិសេធការអះអាងសិទ្ធិទាំងនេះ ដោយសារពួកគេគ្មានមូលដ្ឋានទេ»។

លោកបានបន្ថែមថា សកម្មភាពបែបនេះរបស់ចិន ត្រឹមតែធ្វើឲ្យស្មុគស្មាញដល់ការដោះស្រាយបញ្ហាព្រំដែនប៉ុណ្ណោះ ខណៈទីក្រុងប៉េកាំង មិនទាន់បានឆ្លើយតបជាផ្លូវការនៅឡើយទេ ចំពោះការលើកឡើងនេះ។

ការតវ៉ារបស់ឥណ្ឌានេះ កើតឡើងប៉ុន្មានថ្ងៃបន្ទាប់ពីនាយករដ្ឋមន្ត្រីឥណ្ឌា លោក Narendra Modi និងប្រធានាធិបតីចិន លោក Xi Jinping បានជួបជជែកគ្នានៅខាងក្រៅកិច្ចប្រជុំកំពូល BRICS នៅអាហ្វ្រិកខាងត្បូង។ មន្ត្រីឥណ្ឌាមួយរូបបាននិយាយបន្ទាប់មកថា ប្រទេសទាំង២ បានយល់ព្រម «បង្កើនកិច្ចប្រឹងប្រែងក្នុងការដោះស្រាយជាបន្ទាន់ និងបន្ថយភាពតានតឹង នៅតាមបណ្តោយព្រំដែនដែលមានជម្លោះ។

ដើមហេតុនៃភាពតានតឹង រវាងប្រទេសជិតខាងទាំង២ គឺបញ្ហាព្រំដែនពិតដែលមានជម្លោះប្រវែង ៣.៤៤០គីឡូម៉ែត្រ តាមបណ្តោយភ្នំហិម៉ាល័យ ដែលហៅថា Line of Actual Control (ខ្សែបន្ទាត់គ្រប់គ្រងជាក់ស្តែង) ឬ LAC ដែលត្រូវបានកំណត់ព្រំដែនយ៉ាងលំបាក។ ការរួមផ្សំគ្នានៃទន្លេ បឹង និងផ្ទាំងទឹកកក មានន័យថា ខ្សែបន្ទាត់ព្រំដែន អាចមានភាពល្អៀងនៅកន្លែងខ្លះបាន៕