ក្រុមអ្នកបរិស្ថានមានការព្រួយបារម្ភកាន់តែខ្លាំងឡើងៗអំពីស្ថានភាពបឹង និងទន្លេរបស់ប្រទេសអ៊ីតាលី បន្ទាប់ពីអាកាសធាតុក្តៅអូសបន្លាយជាច្រើនខែ និងសីតុណ្ហភាព ឡើងក្តៅកាន់តែខ្លាំង។

ប្រទេសអ៊ីតាលី បាននាំមុខគេ ក្នុងការប្រឈមជាមួយព្រឹត្តិការណ៍អាកាសធាតុឡើងក្ដៅខ្លាំង។ បច្ចុប្បន្ន ប្រទេសនេះ កំពុងជួបប្រទះនឹងសីតុណ្ហភាពធ្លាក់ចុះយ៉ាងខ្លាំង ដោយសារមានខ្យល់បក់ និងភ្លៀងធ្លាក់ខ្លាំង ដែលកើតមានត្រឹមតែប៉ុន្មានថ្ងៃបន្ទាប់ពីមានរលកកម្ដៅក្ដៅខ្លាំង។

ទន្លេ និងបឹងជាច្រើនរបស់ប្រទេសនេះ កំពុងភប់ប្រសព្វនឹងកង្វះខាតទឹកយ៉ាងធ្ងន់ធ្ងរ ដោយសារតែរលកកម្ដៅក្ដៅហួតហែង និងគ្រោះរាំងស្ងួតយ៉ាងធ្ងន់ធ្ងរ ហើយក្រុមអ្នកបរិស្ថាន មានការព្រួយបារម្ភអំពីផលប៉ះពាល់នៃបម្រែបម្រួលអាកាសធាតុ។ ជាមួយគ្នានេះ ពួកគេក៏កំពុងធ្វើការព្រមានផងដែរអំពីការកើនឡើងនៃកម្រិតបង្កកង្វក់នៅក្នុងផ្លូវទឹករបស់ប្រទេសនេះ ដោយសារអាកាសធាតុឡើងក្ដៅខ្លាំង។ 

អង្គការមិនមែនរដ្ឋាភិបាលផ្នែកបរិស្ថាន ក៏កំពុងតាមដានយ៉ាងយកចិត្តទុកដាក់លើកម្រិតការបង្កកង្វក់ នៅក្នុងទន្លេ២ របស់ទីក្រុងរ៉ូម គឺទន្លេ Tiber ដែលជាទន្លេវែងបំផុតទី៣ ក្នុងប្រទេសអ៊ីតាលី និងទន្លេ Aniene ដែលជាទន្លេជួយចិញ្ចឹមបីបាច់ទន្លេ Tiber។

ជាមួយគ្នានេះដែរ អ្នកសង្កេតការណ៍បានចង្អុលបង្ហាញថា ដោយមានការប្រែប្រួលអាកាសធាតុនាំឲ្យមានគ្រោះរាំងស្ងួតរយៈពេលយូរ ដែលជាដំណើរវដ្តចក្រដ៏អាក្រក់ អាចនឹងកើតឡើង។ ពួកគេបានបន្ថែមថា កម្រិតទឹកទាបជាងនេះ មានន័យថា សារធាតុបង្កកង្វក់ ដែលបង្កគ្រោះថ្នាក់ មិនអាចត្រូវបានធ្វើឲ្យស្អាតដោយទន្លេ ដែលនឹងធ្វើឲ្យទន្លេបុរាណ Tiber មិនអាចការពារខ្លួនវាបាន៕