បារាំង ៖ អ្នកនាំពាក្យរដ្ឋាភិបាលបារាំង លោក អូលីវីយេ វេរ៉ង់ (Olivier Veran) បាននិយាយ នៅថ្ងៃពុធ (ទី៣០ ខែសីហា) នេះ ថា ប្រទេសបារាំងថ្កោលទោសការធ្វើរដ្ឋប្រហារ នៅប្រទេសហ្គាបុង ហើយចង់ឲ្យលទ្ធផលនៃការបោះឆ្នោត នៅក្នុងប្រទេសនេះ ត្រូវបានគោរព។

បណ្ដាមន្ត្រីយោធា នៅក្នុងប្រទេសផលិតប្រេងហ្គាបុង បានឲ្យដឹងថា ពួកគេបានដណ្តើមអំណាច នៅថ្ងៃពុធនេះ ហើយបានឃុំខ្លួនប្រធានាធិបតី លោក Ali Bongo នៅក្នុងផ្ទះ បន្ទាប់ពីស្ថាប័នបោះឆ្នោតរបស់រដ្ឋអាហ្រ្វិកកណ្តាលមួយនេះ បានប្រកាសថា លោក Bongo បានឈ្នះឆ្នោតអាណត្តិទី៣។

ក្នុងសេចក្តីប្រកាសតាមទូរទស្សន៍មួយយប់ មន្ត្រីជាន់ខ្ពស់រាប់សិបនាក់ បានប្រកាសថា លទ្ធផលបោះឆ្នោតត្រូវបានលុបចោល ព្រំដែនត្រូវបានបិទ ហើយស្ថាប័នរដ្ឋ ត្រូវបានរំលាយ។ មន្ត្រីទាំងនោះ បាននិយាយថា ពួកគេតំណាងឲ្យកងកម្លាំងសន្តិសុខ និងការពារជាតិរបស់ប្រទេសហ្គាបុងទាំងអស់។

ប្រសិនបើទទួលបានជោគជ័យ នេះនឹងក្លាយជារដ្ឋប្រហារទី៨ នៅអាហ្វ្រិកខាងលិច និងកណ្តាល គិតចាប់តាំងពីឆ្នាំ២០២០។ រដ្ឋប្រហារចុងក្រោយបំផុត ក្នុងប្រទេសនីហ្សេ គឺកាលពីខែកក្កដា។ ក្រុមមន្ត្រីយោធា ក៏សុទ្ធតែបានដណ្តើមអំណាចផងដែរ នៅប្រទេសម៉ាលី ហ្គីណេ ប៊ូគីណាហ្វាសូ និងឆាដ ដោយការធ្វើបែបនេះ បានលុបបំបាត់ការការរីកលូតលាស់នៃលទ្ធិប្រជាធិបតេយ្យ ចាប់តាំងពីទសវត្សរ៍ឆ្នាំ១៩៩០៕