​បាល់ទាត់៖ ​ផ្លូវការ​ហើយ សហព័ន្ធ​បាល់ទាត់​អាល្លឺម៉ង់​ បានបញ្ជាក់​នៅ​ថ្ងៃ​អង្គារ​ម្សិលមិញ​ថា​ លោក Hansi Flick នឹង​ក្លាយ​ជា​អ្នកចាត់ការ​ក្រុម​ជំរើសជាតិ​អាល្លឺម៉ង់​ ក្រោយ​បញ្ចប់​ព្រឹត្តិការណ៍​ជើងឯក​ទ្វីប​អឺរ៉ុប Euro ២០២០ ខាងមុខនេះ​បន្ត​តំណែង​ពី​លោក Joachim Low​។​

​កាលពី​ខែ​មុន​លោក Hansi Flick បាន​និយាយថា​ លោក​នឹង​ចាក​ចេញពី Bayern Munich ក្រោយ​ចប់​រដូវ​កាល​នេះ ហើយ​ក្លិប​ក៏បាន​រៀបចំ​ពិធី​លា​បុរស​វ័យ ៥៦ឆ្នាំ​រូបនេះ​ផងដែរ​អំឡុងពេល Bayern Munich អបអរ​លើក​ពាន​ជើងឯក Bundesliga អាល្លឺម៉ង់ ៩រដូវ​កាល​ជាប់​គ្នា​កាលពី​ចុង​សប្តាហ៍​កន្លង​ទៅ​។ ​នៅពេលនេះ​សហព័ន្ធ​បាល់ទាត់​អាល្លឺម៉ង់ DFB បានបញ្ចប់​ពាក្យ​ច​ចាម​អារ៉ាម​មិន​ច្បាស់​នេះ​ទៀតហើយ​ដោយ​លោក Hansi Flick ចុះហត្ថលេខា​ដឹកនាំ​ក្រុម​ជើងឯក​ពិភពលោក ៤សម័យ​អាល្លឺម៉ង់​រហូតដល់​ឆ្នាំ២០២៤​។ ​ការសំរេច​ចាកចេញ​ពី Bayern Munich របស់លោក Hansi Flick កើតឡើង​បន្ទាប់ពី Bayern Munich ធ្លាក់​ពី UEFA Champions League ត្រឹម​វគ្គ ៨ក្រុម​ចុងក្រោយ​ក្រោម​ស្នាដៃ​ក្រុម​បារាំង Paris Saint Germain​។​

​​លោក Hansi Flick បាន​កាន់តំណែង​នៅ​ឆ្នាំ២០១៩ ក្នុងនាម​ជា​អ្នកចាត់ការ​បណ្តោះអាសន្ន​បន្ត​ពី​លោក Niko Kovac ដែល​ត្រូវបាន​បណ្តេញចេញ​ មុននឹង​ទទួលបាន​កុងត្រា​ជាគ្រូ​បង្គោល​ផ្លូវការ​ដល់​ឆ្នាំ២០២៣​។ ​ក្នុងការ​ដឹកនាំ Bayern Munich ត្រឹម​រយៈពេល​ខ្លី​ប៉ុណ្ណោះ​រដូវ​កាល​ដំបូង​នោះ​លោក Hansi Flick បាន​ជួយ​ក្រុម​ឈ្នះ​ជើងឯក Bundesliga និង German Cup​។ ​រដូវ​កាល​បន្ទាប់ពី​លោក Hansi Flick បាន​ជួយ Bayern Munich ឈ្នះ​ជើងឯក Bundesliga ម្តងទៀត និង​ឈ្នះ​ជើងឯក UEFA Champions League រដូវ​កាល​មុន​។ ​Hansi Flick ដឹកនាំ Bayern Munich ឈ្នះ​ដល់​ទៅ ៨៣% ​ក្នុងចំណោម​ការប្រកួត​សរុប ៨៦ប្រកួត​ឈ្នះ ៧០ ស្មើ ៩ ចាញ់​តែ ៧ប្រកួត​ប៉ុណ្ណោះ​៕

​អត្ថបទ​៖​នាង សុភា​វុ​ធ