ភ្នំពេញ៖ នៅពេលនេះ ក្រសួងប្រៃសណីយ៍ និងទូរគមនាគមន៍ និងក្រសួងកសិកម្ម រុក្ខាប្រមាញ់ និង​នេសាទ ប្រកាសផ្លាស់ប្តូរ ​និងប្រើប្រាស់លេខទូរសព្ទ១២៨៩ ​ដើម្បីឲ្យកសិករនានា​ ទូរសព្ទហៅសួរ ទៅមន្ត្រីជំនាញកសិកម្ម ​ជួយដោះស្រាយផ្នែកបច្ចេកទេសកសិកម្ម ​ការផ្តល់ប្រឹក្សារបៀបដាំដំណាំ និងការចិញ្ចឹមសត្វជាដើម​។

លោក ម៉ៅ មីនា​ ប្រធាននាយកដ្ឋានផ្សព្វផ្សាយកសិកម្ម រុក្ខាប្រមាញ់ ​និងនេសាទ ​នៃក្រសួងកសិកម្ម បានប្រាប់BTV នៅថ្ងៃទី៣១ ​ខែសីហានេះថា នៅពេលនេះ​ ក្រសួងកសិកម្ម បាន​សម្រេច​ផ្លាស់ប្តូរប្រព័ន្ធលេខទូរសព្ទពីលេខ ១៨០០ ២០១៥ ៦៨ មកប្រើប្រាស់ ប្រព័ន្ធលេខទូរសព្ទ ១២៨៩ វិញ ដើម្បីឲ្យប្រជាកសិករ ងាយស្រួលចងចាំ និងអាចខលហៅសួរមន្ត្រីជំនាញកសិកម្ម ដោយមិនគិតថ្លៃ​សេវាទូរសព្ទ អំពីការផ្តល់ដោះស្រាយ ​និងការផ្តល់ប្រឹក្សាយោបល់ជូនកសិករ លើ​ផ្នែកបច្ចេកទេសកសិកម្ម និងទីផ្សារកសិផលជាដើម។

លោក ម៉ៅ មីនា ថ្លែងថា ចំពោះទូរសព្ទលេខ ១២៨៩ ថ្មីនេះ គឺគ្រប់កសិករអាចខលហៅសួរ មន្ត្រីជំនាញ​កសិកម្មដោយផ្ទាល់ ​ចាប់ពីថ្ងៃច័ន្ទដល់ថ្ងៃសុក្រ ​និងចាប់ពីម៉ោង ​៨:៣០ព្រឹក​ រហូតម៉ោង ១១:៣០ថ្ងៃត្រង់ ហើយរសៀលចាប់ពីម៉ោង១:៣០នាទី ដល់ម៉ោង៤ល្ងាច។

បណ្តាកសិករ នៅសង្កាត់សិត្បូ ក្រុងតាខ្មៅ ខេត្តកណ្តាល បានថ្លែងការពេញចិត្តជាខ្លាំងចំពោះ ការប្រកាស​ប្រើប្រាស់លេខទូរសព្ទងាយស្រួលចងចាំ ​និងខលហៅសួរ ទាក់ទងបច្ចេកទេស​កសិកម្មដោយមិនគិតថ្លៃសេវាទូរសព្ទ។

សូមបញ្ជាក់ថា ទន្ទឹមនឹងការប្រើប្រាស់ប្រព័ន្ធលេខទូរសព្ទបួនលេខ ដើម្បីបម្រើសេវាអតិថិជន និង​កសិករនេះដែរ ក្រសួងកសិកម្ម រុក្ខាប្រមាញ់ និងនេសាទ​ ក៏បានរៀបចំមន្ត្រីជំនាញកសិកម្ម នៅ​តាមខេត្តប្រមាណជាង១០០នាក់ ​ដែលក្នុងមួយខេត្ត មានមន្ត្រី៤រូប រង់ចាំចុះជួបកសិករដោយផ្ទាល់​ផងដែរ ប្រសិនបើនៅពេលកសិករ ​ខលហៅសួរនោះ ​មានតម្រូវការ ​និងស្នើសុំមន្ត្រីជំនាញកសិកម្ម ចុះទៅជួប និងពិនិត្យស្ថានភាពកសិកម្មដោយផ្ទាល់ នៅតាមមូលដ្ឋានកសិករ៕អត្ថបទ ស៊ុម សុខជា