ហ្គាហ្សា៖ បណ្ដាប្រទេសកាន់សាសនាអ៊ីស្លាម កំពុងអំពាវនាវដល់អង្គការសហប្រជាជាតិ ស៊ើបអង្កេតពីការប្រព្រឹត្តឧក្រិដ្ឋកម្មសង្គ្រាមដែលអាចកើតមាន អំឡុងជម្លោះរយៈពេល ១១ថ្ងៃរវាងអ៊ីស្រាអែល និងក្រុមសកម្មប្រយុទ្ធប៉ាឡេស្ទីនហាម៉ាស់ និងដើម្បីបង្កើតក្រុមស៊ើបអង្កេតឧក្រិដ្ឋកម្មសង្គ្រាម។
ក្រុមប្រឹក្សាសិទ្ធិមនុស្សរបស់អង្គការសហប្រជាជាតិ នឹងរៀបចំសម័យប្រជុំពិសេសមួយស្ដីពីស្ថានការវិវឌ្ឍន៍ចុងក្រោយ នៃជម្លោះនេះនៅថ្ងៃព្រហស្បតិ៍ស្អែកនេះ តបតាមសំណើរបស់ប្រទេសប៉ាគីស្ថាន ដែលជាអ្នកសម្របសម្រួលនៃអង្គការកិច្ចសហប្រតិបត្តិការអ៊ីស្លាម (OIC) និងរដ្ឋអ៊ីស្រាអែល។ ប្រទេសទាំងនោះបានដាក់ជូន ពង្រាងសេចក្ដីសម្រេចកាលពីល្ងាចថ្ងៃអង្គារ ដែលនឹងបង្កើតគណៈកម្មការអន្តរជាតិឯករាជ្យ សម្រាប់ការស៊ើបអង្កេតរាល់ការរំលោភសិទ្ធិមនុស្ស ក្នុងដែនដីគ្រប់គ្រងដោយប៉ាឡេស្ទីន រួមទាំងទីក្រុងហ្ស៊េរុយសារឡឹមខាងកើត និងនៅអ៊ីស្រាអែលចាប់តាំងពីថ្ងៃពី១៣ ខែមេសាមក។
សេចក្ដីពង្រាវនោះនិយាយថា ក្រុមនេះក៏នឹងពិនិត្យផងដែរលើឫសគល់នៃភាពតានតឹង និងអស្ថិរភាពដែលនៅតែបន្ត រួមមានការរើសអើងជាប្រព័ន្ធ និងការសង្កត់សង្កិនដោយផ្អែកលើជាតិសាសន៍ ជាតិពន្ធ ពូជអំបូរ ឬអត្តសញ្ញាណខាងសាសនា៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
