ប្រធានាធិបតីឥណ្ឌូនេស៊ីលោក ចូកូ វីដូដូ (Joko Widodo) បានគំរាមដាក់ទណ្ឌកម្មលើរោងចក្រដែលមិនព្រមដំឡើងប្រព័ន្ធគ្រប់គ្រងការបង្វក់ ដើម្បីឆ្លើយតបទៅនឹងគុណភាពខ្យល់មិនល្អរបស់រដ្ឋធានីនេះ ។

លោកវីដូដូ បាននិយាយកាលពីថ្ងៃពុធថា៖«ការដាក់ទណ្ឌកម្ម គឺជាក់លាក់ហើយ [ឧស្សាហកម្ម] អាចត្រូវបានបិទ ប្រសិនបើពួកគេបដិសេធមិនជួសជុលនេះ ប្រសិនបើពួកគេមិនដំឡើងម៉ាស៊ីនសម្អាតឧស្ម័នពុល ពីព្រោះតម្លៃដែលយើងចំណាយសម្រាប់សុខភាពរបស់យើង គឺថ្លៃណាស់។

ដើម្បីកាត់បន្ថយការបំពុលបរិយាកាស ក្រុមមន្ត្រីបានបង្កើតគោលនយោបាយពីការបំពេញការងារពីផ្ទះ តម្រូវឲ្យអ្នកបើកបរបញ្ជូនយានយន្តទៅធ្វើតេស្តការបំភាយឧស្ម័ន និងជំរុញឲ្យប្រជាពលរដ្ឋប្រើប្រាស់មធ្យោបាយធ្វើដំណើរសាធារណៈ និងប្រើប្រាស់យានយន្តអគ្គិសនី។

លោកវីដូដូ បានជ្រើសរើសរដ្ឋមន្ត្រីជាន់ខ្ពស់ លោក លូហ៊ុត ប៊ីនសា ប៉ានចៃតាន (Luhut Binsar Pandjaitan) ដើម្បីដឹកនាំកិច្ចខិតខំប្រឹងប្រែងប្រឆាំងនឹងការបំពុលបរិយាកាស រួមទាំងការដាំដើមឈើ ការកែប្រែអាកាសធាតុ និងការអនុវត្តច្បាប់។