ប្រទេសម៉ាឡេស៊ីបានចូលរួមជាមួយឥណ្ឌា ក្នុងការតវ៉ាប្រឆាំងនឹងការអះអាងសិទ្ធិរបស់ប្រទេសចិនលើដែនដីដែលមានជម្លោះ ដោយត្រូវបានដាក់បញ្ចូលក្នុងផែនទីដែលបានចេញផ្សាយថ្មីរបស់ខ្លួន ខណៈដែលឥណ្ឌូនេស៊ី និយាយថា ខ្លួនកំពុងស្វែងរកព័ត៌មានលម្អិតបន្ថែមលើបញ្ហានេះ តាមរយៈស្ថានទូតរបស់ខ្លួន ប្រចាំនៅទីក្រុងប៉េកាំង។

ក្រសួងធនធានធម្មជាតិរបស់ប្រទេសចិន កាលពីថ្ងៃចន្ទ (ទី២៨ ខែសីហា) បានចេញ «China Standard Map Edition 2023» ឬផែនទីស្តង់ដាររបស់ចិនច្បាប់ឆ្នាំ២០២៣ ដែលអះអាងសិទ្ធិលើតំបន់សេដ្ឋកិច្ចផ្តាច់មុខ (EEZ) នៃតំបន់សមុទ្ររបស់ម៉ាឡេស៊ី នៅជិតរដ្ឋ Borneo រដ្ឋ Sabah និងរដ្ឋ Sarawak ប្រទេសប្រ៊ុយណេ ហ្វីលីពីន ឥណ្ឌូនេស៊ី និងវៀតណាម ព្រមទាំងតំបន់ដីគោកមួយចំនួន ក្នុងប្រទេសឥណ្ឌា។

ឥឡូវនេះ មានខ្សែបន្ទាត់ចំនួន ១០ចំណុច ឬ «10-dash» ដោយមានបន្ថែមបន្ទាត់ទៅភាគខាងកើតនៃកោះតៃវ៉ាន់ ដែលជាការបំបែកចេញពីខ្សែបន្ទាត់ធម្មតាចំនួន៩ ដែលទីក្រុងប៉េកាំង បាន និងកំពុងប្រើប្រាស់ នៅប៉ុន្មានឆ្នាំចុងក្រោយនេះ ដើម្បីធ្វើការអះអាងសិទ្ធិរបស់ខ្លួនលើផ្នែកដ៏ធំនៃសមុទ្រចិនខាងត្បូង។

ជាការឆ្លើយតបនឹងផែនទីថ្មីនេះ ក្រសួងការបរទេសរបស់ម៉ាឡេស៊ី កាលពីថ្ងៃពុធ (ទី៣០ ខែសីហា) បានប្រាប់ថា ខ្លួនមិនទទួលស្គាល់ការអះអាងរបស់ចិន នៅក្នុងសមុទ្រចិនខាងត្បូងនោះទេ ដោយបន្ថែមថាផែនទីនេះ មិនមានសិទ្ធិអំណាចចាំបាច់លើម៉ាឡេស៊ីនោះទេ។ ក្រសួងបានសង្កត់ធ្ងន់ថា ម៉ាឡេស៊ីតែងតែបដិសេធការអះអាងរបស់ភាគីបរទេសណាមួយ ចំពោះអធិបតេយ្យភាព សិទ្ធិអធិបតេយ្យភាព និងយុត្តាធិការលើសណ្ឋានដែនសមុទ្រ ឬតំបន់ដែនសមុទ្រ ដោយផ្អែកលើផែនទីថ្មីរបស់ម៉ាឡេស៊ីឆ្នាំ១៩៧៩។

ចំណែកប្រទេសឥណ្ឌូនេស៊ី នៅមិនទាន់បានចេញការឆ្លើយតបជាផ្លូវការនោះទេ ជុំវិញផែនទីថ្មីរបស់ចិន ដែលអះអាងសិទ្ធិលើទឹកដីជុំវិញប្រជុំកូនកោះ Natuna ដែលស្ថិតនៅក្នុងតំបន់សេដ្ឋកិច្ចផ្ដាច់មុខ (EEZ) ប្រវែង ២០០ម៉ាយល៍ (ជាង ៣៧០គីឡូម៉ែត្រ) របស់ខ្លួន។ យោងតាមសារព័រត៌មាន BBC News Indonesia បានឲ្យដឹងថា ក្រសួងការបរទេសឥណ្ឌូនេស៊ីបច្ចុប្បន្ន កំពុងស្វែងរក «ការពិតនៃព័ត៌មាន» ទាក់ទងនឹងផែនទីថ្មីនេះ។

នៅពេលសួរថា តើឥណ្ឌូណេស៊ី នឹងតវ៉ាដូចឥណ្ឌាដែរ ឬទេ អ្នកនាំពាក្យក្រសួងការបរទេស លោក Teuku Faizasyah បាននិយាយថា អាជ្ញាធរកំពុងតែរង់ចាំមតិយោបល់ពីស្ថានទូតឥណ្ឌូនេស៊ីជាមុនសិន៕