កណ្ដាល ៖ ថ្លែងក្នុងសុន្ទរកថារបាយការណ៍ស្វាគមន៍ក្នុងពិធីសំណេះសំណាលជាមួយកម្មករនិយោជិតប្រមាណ១ម៉ឺន៨ពាន់នាក់នៅក្រុងតាខ្មៅខេត្តកណ្តាលក្រោមអធិបតីភាពឯកឧត្តមកិត្តិទេសាភិបាលបណ្ឌិត ហ៊ុន ម៉ាណែត នៅថ្ងៃទី០១ ខែកញ្ញានេះ  ឯកឧត្តម ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានប្តេជ្ញាធ្វើជាប្រតិបត្តិករដ៏ល្អ និងអនុវត្តឱ្យបានជាដាច់ខាតនូវអនុសាសន៍របស់ឯកឧត្តមនាយករដ្ឋមន្ត្រីលើការអុវត្តឱ្យកាន់តែប្រសើរបន្ថែមទៀតនូវលក្ខខណ្ឌការងារ និងផលិតភាពការងារបស់កម្មករនិយោជិតសំដៅលើកកម្ពស់ជីវភាពបងប្អូនកម្មករឱ្យកាន់តែប្រសើរ។

ក្នុងន័យនេះ ឯកឧត្តមរដ្ឋមន្ត្រីលើកឡើងថា ក្រសួងប្តេជ្ញាធ្វើការជាមួយគ្រប់ភាគី និងស្ថាប័នពាក់ព័ន្ធទាំងអស់ និងចាត់ទុកគ្រប់តួអង្គពាក់ព័ន្ធទាំងអស់គឺជាដៃគូដ៏ល្អក្នុងការបំពេញភារកិច្ច ហើយក៏​នឹងខិតខំអភិវឌ្ឍសមត្ថភាពមន្ត្រីក្រោម​ឱវាទរបស់ខ្លួន​ឱ្យក្លាយទៅជាមន្ត្រី ដែលមានក្រមសីលធម៌ខ្ពស់ ចំណេះដឹងច្បាស់លាស់ បំពេញតួនាទីប្រកប​ដោយ​វិជ្ជាជីវៈ ជើងជាប់ដី រហ័សរហួនវាងវៃក្នុងការដោះស្រា​យ​បញ្ហានានាជូនបងប្អូនកម្មករនិយោជិត និងនិយោជក។

មួយវិញទៀត ឯកឧត្តមរដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានសន្យានឹងប្រែក្លាយគ្រប់អនុសាសន៍ទាំងអស់របស់ឯកឧត្តមនាយករដ្ឋមន្ត្រីទៅជាត្រីវិស័យ ជាសូចនាករ និងសមាហរណកម្មចូលទៅក្នុងផែនការយុទ្ធសាស្ត្រអភិវឌ្ឍ វិស័យការងារ សន្តិសុខ​សង្គម និងបណ្តុះបណ្តាលវិជ្ជាជីវៈ ២០២៣-២០២៨។

ក្រៅពីនេះ ឯកឧត្តមរដ្ឋមន្ត្រី បានរំលឹកពីវឌ្ឍនភាពនៃលក្ខខណ្ឌការងារដែលបានវិវឌ្ឍកាន់តែប្រសើរព្រោះគិតពីឆ្នាំ១៩៩៧មកដល់បច្ចុប្បន្ន ប្រាក់ឈ្នួលកម្មករបានកើនពី៤០ដុល្លារក្នុង១ខែ កើនដល់២០០ដុលោ្លរក្នុង១ខែ។ បន្ថែមពីនេះ រដ្ឋាភិបាលបានផ្តល់អត្ថប្រយោជន៍ផ្សេងៗទៀតជាច្រើនដើម្បីលើកកម្ពស់ជីវភាព និងការថែទាំសុខភាពរបស់កម្មករតាមរយៈរបបសន្តិសុខសង្គម ជាពិសេសស្ត្រីមានផ្ទៃពោះដែលទទួលបានប្រាក់ឧបត្ថម្ភពីរដ្ឋាភិបាលតាំងពីពពោះ រហូតដល់កូនមានអាយុ២ឆ្នាំ។

ឯកឧត្តមរដ្ឋមន្ត្រីបានសង្កត់ធ្ងន់ថា ទន្ទឹមនឹងការខិតខំដំឡើងប្រាក់ឈ្នួល និងប្រាក់អត្ថប្រយោជន៍ផ្សេងៗ រាជរដ្ឋាភិបាលក៏បានខិតខំកាត់បន្ថយបន្ទុកចំណាយរបស់បងប្អូនកម្មករនិយោជិត ដោយក្រសួងបានបង្កើតនិងពង្រីកវិសាលភាពបេឡាជាតិសន្តិសុខសង្គមជាបន្តបន្ទាប់ ហើយបានតម្រូវឱ្យនិយោជកជាអ្នកបង់ជំនួសបងប្អូនកម្មករនិយោជិត ១០០% ក្នុងផ្នែកថែទាំងសុខភាព និងផ្នែកគ្រោះថ្នាក់ការងារ និងជួយបង់ ៥០% ក្នុងផ្នែកប្រាក់សោធន ដែលជាហេតុធ្វើឱ្យបងប្អូនកម្មករនិយោជិតអាចរក្សាបាននូវសន្តិសុខចំណូល និងកាត់បន្ថយហានិភ័យនានាទាំងនៅក្នុងអំឡុងពេលមានការងារ រហូតដល់ពេលចូលនិវត្តន៍។

សូមបញ្ជាក់ថា ជំនួបថ្ងៃសុក្រ ទី១ ខែកញ្ញានេះ គឺជាលើកទី២ហើយសម្រាប់ឯកឧត្តមកិត្តិទេសាភិបាលបណ្ឌិតហ៊ុន ម៉ាណែត បានចុះជួបសំណេះសំណាលជាមួយកម្មករក្នុងនាមជានាយករដ្ឋមន្ត្រី៕