​

ទូកនេសាទ បានកំណត់ពេលចេញក្រៅពីកំពង់ផែនៅក្នុងខេត្ត Fukushima ជាលើកដំបូង ចាប់តាំងពីរដ្ឋាភិបាល បានចាប់ផ្តើមបញ្ចេញទឹកពង្រាវនិងធ្វើប្រព្រឹត្តិកម្មរួចចូលទៅក្នុងមហាសមុទ្រ ចេញពីរោងចក្រថាមពលនុយក្លេអ៊ែរ Fukushima Daiichi ដែលរងការខូចខាត។

រដូវកាលនេសាទតាមទូក នៅក្នុងខេត្តនេះ បានបើកឡើងវិញនៅថ្ងៃសុក្រនេះ បន្ទាប់ពីបម្រាមរយៈពេល២ខែប្រចាំឆ្នាំដើម្បីការពារធនធានសមុទ្រ។

ពិធីចេញទូក ត្រូវបានធ្វើឡើងនៅកំពង់ផែនេសាទ Matsukawaura ទីក្រុង Soma នៅព្រឹកថ្ងៃសុក្រនេះ។ មន្ត្រីសមាគមជលផល លោក Kikuchi Masahiro បាននិយាយថាវាគួឲ្យសោកស្តាយដែលការបញ្ចេញទឹកពង្រាវនិងធ្វើប្រព្រឹត្តិកម្មបានចាប់ផ្តើម។ លោកនិយាយថា ក្រុមអ្នកនេសាទអាចធ្វើបានល្អបំផុត និងបន្តការនេសាទរបស់ពួកគេ ហើយលោកសង្ឃឹមថាពួកគេនឹងចាប់ត្រីបានច្រើន។ បន្ទាប់ពីការចាប់ផ្តើមចេញទូក ទូក២០គ្រឿងបានឆ្លងកាត់ក្រោមស្ពាន Matsukawaura ដែលជានិមិត្តរូបរបស់ទីក្រុង Soma និងឆ្ពោះទៅកាន់សមុទ្រ។

ប្រធានសមាគមម្ចាស់ទូកនេសាទ លោក Takahashi Toru បាននិយាយថា លោកតែងតែព្រួយបារម្ភនៅថ្ងៃទី១នៃរដូវកាលថាតើពួកគេនឹងចាប់ត្រីប្រភេទណា។ លោកនិយាយថា ការបញ្ចេញទឹកដែលបានធ្វើប្រព្រឹត្តិកម្មនិងពង្រាវរួច បានក្លាយជាប្រធានបទក្តៅនៅក្នុងប្រទេសជប៉ុន និងកន្លែងផ្សេងទៀត ប៉ុន្តែលោកនឹងបន្តការនេសាទជាធម្មតា។