កាលពីថ្ងៃព្រហស្បតិ៍ម្សិលមិញ វិមានក្រឹមឡាំង និយាយថា រុស្ស៊ីនៅតែជាប្រទេសផ្គត់ផ្គង់គ្រាប់ធុញ្ញជាតិគួរឲ្យទុកចិត្តមួយដដែល បើទោះបីជាមានឧបសគ្គបង្កើតឡើងដោយសហរដ្ឋអាមេរិក និងសហភាពអឺរ៉ុបក៏ដោយ ហើយកង្វះខាតស្បៀងអាហារនៅអាហ្វ្រិក គ្មានអ្វីពាក់ព័ន្ធនឹងរុស្ស៊ីនោះទេ ។

អ្នកនាំពាក្យរបស់វិមានក្រឹមឡាំងលោក Dmitry Peskov ត្រូវបានគេសួរនៅក្នុងសន្និសីទសារព័ត៌មាន សម្រាប់ការឆ្លើយតបនឹងការចោទប្រកាន់រាយការណ៍ដោយប្រធានក្រុមប្រឹក្សាសន្តិសុខអ៊ុយក្រែនថា ទីក្រុងម៉ូស្គូ ធ្វើឲ្យកើតមានភាពអត់ឃ្លាននៅអាហ្វ្រិក។

វិមានក្រឹមឡាំង និយាយផងដែរថា គ្មានលទ្ធផលច្បាស់លាស់ ត្រូវបានព្រមព្រៀងនៅឡើយទេលើសំណើររបស់ទីក្រុងម៉ូស្គូឲ្យដឹកជញ្ជូនគ្រាប់ធុញ្ញជាតិរុស្ស៊ី កាត់តាមប្រទេសទួរគី ទៅកាន់ប្រទេសក្រីក្រ ដោយមានការគាំទ្រហិរញ្ញវត្ថុពីប្រទេសកាតា ។

លោក Peskov និយាយថា មាននូវកិច្ចពិភាក្សាលើបញ្ហាមួយនេះ នៅទីក្រុងម៉ូស្គូ ហើយនៅពេលអនាគតដ៏ខ្លីខាងមុខនេះ នឹងមានកិច្ចពិភាក្សាកម្រិតខ្ពស់បំផុត ។ វាពិបាកនិយាយថាតើទំហំបែបណាដែលកិច្ចពិភាក្សាទាំងអស់នេះ នឹងមានប្រសិទ្ធិភាព ប៉ុន្តែលោកសុំនិយាយម្តងទៀតថា រុស្ស៊ី គឺជាអ្នកផ្គត់ផ្គង់គ្រាប់ធុញ្ញជាតិដែលមានទំនួលខុសត្រូវខ្ពស់ ហើយនិងចូលរួមកិច្ចពិភាក្សាបែបនេះ ។

សូមបញ្ជាក់ថា រុស្ស៊ី បាននិយាយកាលពីថ្ងៃពុធថា ពួកគេស្នើសុំផែនការជាជម្រើសផ្សេងដល់កិច្ចព្រមព្រៀងគ្រាប់ធុញ្ញជាតិសមុទ្រខ្មៅរៀបចំឡើងដោយប្រទេសទួរគី ដែលពួកគេបានចាកចេញកាលពីខែកក្កដាកន្លងទៅ ៕