ភ្នំពេញ ៖ ប្រធានក្រុមប្រឹក្សាភិបាលមន្ទីរពេទ្យសាកលវិទ្យាល័យ ស៊ូន ឆាន់យ៉ាង នៃប្រទេសកូរ៉េខាងត្បូងលោក សូ ឃ្យូ អ៊ីល (Kyoil Suh) បានអៈអាងថា មន្ទីរពេទ្យកុមារជាតិ នៃក្រសួងសុខាភិបាល នឹងក្លាយជាមន្ទីរពេទ្យគំរូសម្រាប់ផ្តល់ការថែទាំសុខភាពលើកុមារ នៃព្រះរាជាណាចក្រកម្ពុជា ដែលជាទំពាំងស្នងឬស្សី និងជាក្តីសង្ឃឹមរបស់ប្រទេសជាតិផងដែរ។

​ការថ្លែងរបស់លោក សូ ឃ្យូ អ៊ីល (Kyoil Suh) យ៉ាងដូច្នេះក្នុងពិធីសម្ភោធសហសាលប្រជុំមិត្តភាព ក្នុងភាពជាដៃគូរវាងមនី្ទរពេទ្យកុមារជាតិ និងមនី្ទរពេទ្យសាកលវិទ្យាល័យ ស៊ូន ឆាន់យ៉ាង នៅរសៀលថ្ងៃទី១ ខែកញ្ញា ឆ្នាំ២០២៣នេះ។ លោកបានបន្តថា នេះជាសមិទ្ធផលទី១ នៃការដាក់សម្ពោធឱ្យប្រើប្រាស់បន្ទប់ប្រជុំទាំងបី ហើយសង្ឃឹមថាទៅថ្ងៃអនាគតបន្ទប់ទាំងបីនេះនឹងក្លាយជាទីតាំងក្នុងការចែករំលែកនូវចំណេះដឹងវិស័យសុខាភិបាល និងជាទីកន្លែងក្នុងការជជែកក្នុងការស្វែងរកដំណោះស្រាយធ្វើយ៉ាងណាធ្វើឱ្យកម្ពុជាទទួលបានការរីកចំរើនលើវិស័យសុខាភិបាលថែមទៀត។

ជាមួយគ្នានោះដែរ ឯកឧត្តមសាស្ត្រាចារ្យ ញឹប អង្គាបុស្ស នាយកមន្ទីរពេទ្យកុមារជាតិ បានថ្លែងថា នេះជាមោទនភាពថ្មីមួយទៀត ដែលមន្ទីរពេទ្យកុមារជាតិ សម្រេចបានសមិទ្ធិផលថ្មីដែលបានជួសជុលអគារបណ្តុះបណ្តាលសារឡើងវិញ ដោយប្រើថវិកាមន្ទីរពេទ្យផ្ទាល់ សហការជាមួយមន្ទីរពេទ្យសកលវិទ្យាល័យស៊ូន ឆាន់យ៉ាង នៃប្រទេសកូរ៉េខាងត្បូង ក្នុងការរចនា និងបំពាក់សម្ភារៈក្នុងបន្ទប់ចំនួន៣ នៃអគារបណ្តុះបណ្តាលសម្រាប់បំរើឲ្យផលប្រយោជន៏ នៃការបណ្តុះបណ្តាលគ្លីនិកក្នុងវិស័យសុខាភិបាល ហើយក៏ជាសហសាលប្រជុំបច្ចេកទេសដ៏ចាំបាច់ផងដែរ។ ការរចនានេះបានរៀបចំឲ្យមានជាជីវប្រវត្តិសង្ខេបរបស់មន្ទីរពេទ្យ និងថ្នាក់ដឹកនាំក្នុងសម័យកាលនីមួយៗ ដើម្បីទុកជាឯកសារសម្រាប់សាធារណៈជន។ 

ឯកឧត្តមនាយកមន្ទីរពេទ្យកុមារជាតិ សង្ឃឹមថាសមិទ្ធិផលនេះ នឹងបានជាប្រយោជន៏ដល់មនុស្សគ្រប់គ្នាសាទរដោយសេចក្តីរីករាយ និងដោយសេចក្តីស្រលាញ់។ ឯកឧត្តមនាយកមន្ទីរពេទ្យកុមារជាតិរំលឹកថាមន្ទីរពេទ្យកុមារជាតិ និងមន្ទីរពេទ្យសាកលវិទ្យា ស៊ូន ឆាន់យ៉ាង បានក្លាយជាមិត្តល្អ និងគ្នាតាំងពីឆ្នាំ២០១៤ មកម្លេះ ហើយបន្ទាប់ថ្នាក់ដឹកនាំ របស់មនី្ទរពេទ្យ ត្រូវបានអញ្ជើញទៅធ្វើទស្សនកិច្ចនៅទីនោះផងដែរ។ ក្រោយមកក៏មានកម្មវិធីបណ្តុះបណ្តាលជាបន្តបន្ទាប់ដល់បុគ្គលិក នៃមន្ទីរពេទ្យកុមារជាតិ ដោយក្រុមសាស្ត្រាចារ្យ នៃមន្ទីរពេទ្យសាកលវិទ្យាល័យ ស៊ូន ឆាន់យ៉ាង ចាប់តាំងពីឆ្នាំ២០១៤ រហូតដល់ឆ្នាំ២០១៧។ 

ឯកឧត្តមសាស្ត្រាចារ្យ ញឹប អង្គាបុស្ស បានបញ្ជាក់ថា ចំណងសាមគ្គីភាពនេះ បានជួយបណ្តុះបណ្តាលពង្រឹងសមត្ថភាពបុគ្គលិកមន្ទីរពេទ្យកុមារជាតិ លើការថែទាំព្យាបាលទារក និងកុមារ ការទប់ស្កាត់ការចម្លងរោគ និងការអភិវឌ្ឍគុណភាពសេវាសុខាភិបាលផងដែរ តាមរយៈ QI training course. ដែលសកម្មភាពនេះជាចំណែកមួយ បានជួយឲ្យមន្ទីរពេទ្យកុមារជាតិ ក្លាយជាអ្នកបណ្តុះបណ្តាលបន្តកាន់តែរឹងមាំ រហូតអាចចែករំលែកដល់បណ្តាខេត្តផ្សេងៗ និងចូលរួមជាមួយក្រុមការងារថ្នាក់ជាតិ នៃក្រសួងសុខាភិបាលក្នុងការបង្កើតកម្មវិធីបណ្តុះបណ្តាល គោលការណ៏ណែនាំជាតិ និងសកម្មភាពចុះវាយតម្លៃការថែទាំព្យាបាលទារកតាមមន្ទីរពេទ្យខេត្តនានាផងដែរ។ ទស្សនវិស័យរបស់មន្ទីរពេទ្យកុមារជាតិ មិនត្រឹមជាកន្លែងព្យាបាលជំងឺប៉ុណ្ណោះទេ តែក៏ជាកន្លែងបណ្តុះបណ្តាលគ្លីនិកថ្នាក់ជាតិ សម្រាប់ពង្រឹងសមត្ថភាពបុគ្គលិកសុខាភិបាល សិស្ស និស្សិតផងដែរ។ និយាយដោយឡែកសម្រាប់ទស្សនផ្ទាល់ខ្លួនរបស់ឯកឧត្តមសាស្រ្តាចារ្យ បុគ្គលិកសុខាភិបាលទាំងអស់ ត្រូវតែបន្តការសិក្សាពេញមួយជីវិត ព្រោះចំណេះដឹងវិទ្យាសាស្ត្រគឺអភិវឌ្ឍឥតឈប់ឈរ។ ដូច្នេះដើម្បីផ្តល់សេវាល្អ គឺចាំបាច់ត្រូវមាន ទាំងចំណេះដឹង ឥរិយាបទក្រមសីលធម៌វិជ្ជាជីវៈ និងជំនាញច្បាស់លាស់ ហើយទាំងអស់នោះកើតឡើងបាន គឺត្រូវការបណ្តុះបណ្តាល៕

អត្ថបទ៖ រដ្ឋា