ក្រោយព្យុះសង្ឃរា Idaliaបោកបក់ឆ្លងផុត ប្រជាពលរដ្ឋរស់នៅតាមតំបន់ឆ្នេរក្រចកសេះ បានវិលត្រឡប់មកកាន់ផ្ទះសម្បែងរបស់ពួកគេវិញ ។ 

 ព្យុះ Idalia បានបោកបក់លើតំបន់ឆ្នេររបស់រដ្ឋផ្ល័រីដា សហរដ្ឋអាមេរិក កាលពីព្រឹកថ្ងៃពុធ ក្នុងនាមជាព្យុះប្រភេទទី ៣ ដោយបោកបក់ក្នុងកម្លាំងខ្យល់បក់ជាង ២០០គ.មក្នុង១ម៉ោង និងនាំមកជាមួយភ្លៀងធ្លាក់ខ្លាំង និងរលកសមុទ្រខ្លាំង ។ 

 ស្របពេលដែលឧទ្ធម្ភាគចក្រហោះក្រឡឹងពីលើ ទិដ្ឋភាពទូទៅរបស់តំបន់ឆ្នេរមួយនេះ បង្ហាញរូបភាពរងគ្រោះបង្កឡើងដោយសារកម្លាំងធម្មជាតិ ។ នៅក្នុងចំណោមកម្ទេចកម្ទីទាំងនោះ មានទាំងផ្ទះបាក់រលំមួយខ្នង រថយន្តលិចក្នុងទឹក ហើយនិងឃ្លាំងរងការបំផ្លិចបំផ្លាញ ។ 

 លោកតា John Abrandt វ័យ ៧៧ឆ្នាំ បានសំឡឹងមើលផ្ទះរបស់លោក ហើយលោកនិយាយថា ខ្ញុំមានអារម្មណ៍ល្អខ្លាំងណាស់ នៅពេលដែលផ្ទះរបស់លោកពុំបានទៅណា ។ 

 ចំណែកឯលោក Dan Ellison វ័យ ៦១ឆ្នាំ ដែលបានបន្តវេនពីឪពុករបស់លោកជាអ្នកនេសាទបង្គារ បានចង្អុរផ្ទះរបស់លោកដែលមិនបានបាក់រលំដោយសារកម្លាំងព្យុះ ហើយលោកនិយាយថា សហគមន៍តំបន់ឆ្នេរក្រចកសេះ នឹងរួបរួមគ្នា ។  

 ខណៈពេលនោះដែរ ស្រ្តីជាម្តាយ និងកូនស្រីម្នាក់បានឱបគ្នានៅមុខផ្ទះរងការខូចខាតរបស់ពួកគេ ដោយកូនស្រី បាននិយាយធានាដល់ម្តាយរបស់នាងថា ពួកគេនឹងសាងសង់ផ្ទះឡើងវិញ ។ 

 អភិបាលរដ្ឋផ្ល័ររីដា លោក Ron DeSantis បាននិយាយរយៈពេលប៉ុន្មានម៉ោងក្រោយព្យុះបោកបក់ឆ្លងកាត់ថា គ្មានសេចក្តីរាយការណ៍ពីមនុស្សស្លាប់ដោយសារព្យុះ Idalia នោះទេ ៕